Шығыс Қазақстан облысы мен Беларусьтің Могилёв облысы сауда-экономикалық байланысты кеңейтіп, бірлескен жобаларды жүзеге асыруға ниетті. Тараптар ауыл шаруашылығы техникасын өндіруден бастап тамақ өнеркәсібі, лифт құрастыру және туризмге дейінгі бірнеше перспективалы бағытты белгіледі, деп хабарлайды Tizgin.kz.
Экспорт көлемі 65 пайызға артты
Шығыс Қазақстан облысының әкімі Нұрымбет Сақтағанов Могилёв облыстық атқару комитетінің төрағасы Анатолий Исаченко бастаған Беларусь делегациясымен кездесті. Шағын форматта өткен келіссөзге облыстық басқармалардың басшылары, мәслихат пен әкімдік өкілдері қатысты.
Кездесуде сауда-экономикалық, агроөнеркәсіптік және мәдени-гуманитарлық ынтымақтастықты кеңейту, кәсіпорындар арасында тікелей байланыс орнату және ортақ жобаларды жүзеге асыру мәселелері талқыланды.
Нұрымбет Сақтағанов Қазақстан мен Беларусь арасындағы орнықты қарым-қатынасты өңіраралық деңгейдегі нақты жобалармен толықтыру қажеттігін атап өтті.
«Қазақстан мен Беларусь арасындағы өзара достық әрі сындарлы қарым-қатынас нығайып келеді. Бүгінде бұл ынтымақтастықты өңіраралық деңгейде толықтыру маңызды. Ол үшін кәсіпорындар арасындағы тікелей байланысты нығайтып, өзара іс-қимылдың жаңа бағыттарын айқындау және бірлескен жобаларды жүзеге асыру қажет», – деді облыс әкімі.
Өткен жылы Шығыс Қазақстан облысы мен Беларусь арасындағы тауар айналымы 9,2 миллион долларды құраған. Ал 2026 жылдың қаңтар–мамыр айларында бұл көрсеткіш 4,13 миллион долларға жетіп, өткен жылдың сәйкес кезеңімен салыстырғанда 5 пайызға өсті.
Осы аралықта Шығыс Қазақстаннан Беларуське шығарылған экспорт көлемі 65 пайызға артып, 1,31 миллион доллар болды. Қазақстан қазір Могилёв облысының негізгі бес сауда серіктесінің қатарына кіреді.
Ауыл шаруашылығы техникасынан туризмге дейін
Могилёв облыстық атқару комитетінің төрағасы Анатолий Исаченко ауыл шаруашылығына арналған машина жасау мен заманауи техника өндірісін ынтымақтастықтың перспективалы бағыттары ретінде атады.
Оның айтуынша, ауыл шаруашылығы, ет пен сүт өнімдерін қайта өңдеу, тамақ өнеркәсібі және балық шаруашылығы салаларында нақты бірлескен жобаларды айқындауға мүмкіндік бар. Беларусь тарапы Шығыс Қазақстанда беларусьтік лифттерді жеткізу және орнату мүмкіндігін де қарастыруды ұсынды.
Келіссөз барысында екі өңірдің кәсіпорындары арасында тәжірибе алмасуға және тікелей іскерлік байланыс орнатуға ерекше назар аударылды. Осы мақсатта бизнес-миссиялар ұйымдастырып, іскерлік делегациялардың өзара сапарларын өткізу жоспарланып отыр.
Мәдени-гуманитарлық байланыстар да кездесудің жеке тақырыбына айналды. Қазір Шығыс Қазақстан облысында беларусь ұлтының 1,7 мыңға жуық өкілі тұрады. Тараптардың пікірінше, бұл жағдай мәдени және қоғамдық ынтымақтастықты одан әрі дамытуға негіз бола алады.
Сонымен қатар Могилёв облысының туристік операторларына Шығыс Қазақстанның тарихи-мәдени мұрасы мен туристік әлеуетін таныстыру үшін ақпараттық турлар өткізу ұсынылды.
Кездесу қорытындысында екі өңір басшылығы келіссөздерді жалғастырып, белгіленген бағыттар бойынша нақты жобаларды іске асыруға дайын екенін білдірді.
