20 шілдеге қараған түні ұшқышсыз ұшу аппараты Каспий құбыр консорциумының (КҚК) теңіз терминалында тиеу жұмыстарын жүргізіп жатқан мұнай танкеріне қайта шабуыл жасады. Қазақстанның Энергетика министрлігі өрттің жедел түрде сөндірілгенін, зардап шеккендердің жоқ екенін мәлімдеді, деп хабарлайды Tizgin.kz.
«NELSA» танкеріне БПЛА шабуыл жасады
Қазақстан Энергетика министрлігінің мәліметінше, 19 шілдеден 20 шілдеге қараған түні ұшқышсыз ұшу аппараты КҚК теңіз терминалындағы қашықтағы айлақ құрылғысында (ВПУ-1) мұнай тиеп жатқан «NELSA» танкеріне шабуыл жасаған.
Шабуыл салдарынан кемеде өрт шыққан. Өрт қысқа мерзім ішінде толық сөндірілді. Алдын ала мәлімет бойынша, зардап шеккендер жоқ, сондай-ақ мұнайдың теңізге төгілуіне жол берілмеген.
Қазір мамандар танкердің техникалық жай-күйін және болған оқиғаның салдарын бағалап жатыр.
Энергетика министрлігі жағдайды бақылауда ұстап отыр
Энергетика министрлігі Каспий құбыр консорциумымен тұрақты байланыста екенін және жағдайға қатысты жедел ақпаратты үздіксіз алып отырғанын хабарлады.
Еске салайық, бұған дейін Қазақстанның Сыртқы істер министрлігі КҚК инфрақұрылымы арқылы қазақстандық мұнайды тасымалдауға тартылған азаматтық кемелерге жасалған шабуылдарды қатаң айыптап, мұндай әрекеттерді елдің экономикалық мүдделеріне қол сұғу деп бағалаған болатын. Соған қарамастан, Қазақстан тарапының ресми мәлімдемесінен бір тәулік өтпей жатып, КҚК-ның мұнай танкері тағы да шабуылға ұшырады.
