Жаңалықтар

Қазақстанда тұмау жұқтырғандар саны екі есе өсті: ДСМ мәлімдеме жасады

Қазақстанда бір айға жетпейтін уақыт ішінде зертханалық жолмен расталған тұмау жағдайларының саны 5-тен 12-ге дейін өсті. Ал эпидемиологиялық маусым басталғалы ел бойынша 1 миллионнан астам адам жедел респираторлық вирустық инфекцияға (ЖРВИ) шалдыққан. Бұл туралы Tizgin.kz ҚР Денсаулық сақтау министрлігіне сілтеме жасап хабарлайды.

Министрліктің мәліметінше, қазан айының басында Қазақстанда A(H1N1)pdm09 тұмауының алғашқы бес жағдайы тіркелген. Содан бері тағы жеті адамнан осы инфекция анықталған. Осылайша, эпидемиологиялық маусым басталғалы зертханалық жолмен расталған жағдайлардың жалпы саны 12-ге жетті.

Қазақстанда қандай вирустар тарап жатыр

Денсаулық сақтау министрлігінің хабарлауынша, елімізде тұмау және басқа да респираторлық вирустардың таралуына тұрақты мониторинг жүргізіліп жатыр. Зертханалық зерттеулер нәтижесінде тұмауға жатпайтын вирустардың ішінде риновирустар, аденовирустар және бокавирустар басым екені анықталған.

Бұл вирустар тыныс алу жолдарының инфекцияларын тудырып, мұрыннан су ағу, жөтел, тамақ ауруы, дене қызуының көтерілуі және жалпы әлсіздік сияқты белгілермен көрінуі мүмкін. Министрліктің мәліметінше, 22–28 қазан аралығында Қазақстанда 74 689 ЖРВИ жағдайы тіркелген.

Бұл өткен эпидемиологиялық маусымның сәйкес кезеңіндегі көрсеткіштен 44 пайызға төмен. Сонымен қатар бір апта бұрынғы деңгеймен салыстырғанда сырқаттанушылық шамамен 1,5 есе азайған.

Жалпы, эпидемиологиялық маусым басталғалы елімізде 1 075 450 ЖРВИ жағдайы тіркелген. Осылайша, тұмаудың зертханалық жолмен расталған жағдайлары көбейгенімен, ЖРВИ бойынша жалпы сырқаттанушылық көрсеткіші төмендеп отыр.

Қазақстанда тұмауға қарсы вакцинация жалғасып жатыр

Денсаулық сақтау министрлігі еліміздің барлық өңірінде тұмауға қарсы екпе салу науқаны жалғасып жатқанын хабарлады. Ведомствоның мәліметінше, халықты вакцинациялау үшін «Гриппол» вакцинасының 2,2 миллион дозасы сатып алынған. Бұл ел тұрғындарының шамамен 11 пайызын қамтуға мүмкіндік береді.

Вакцина Қазақстанның барлық өңірінде қолжетімді. Мамандар тұмауға қарсы екпе аурудың ауыр өту және асқыну қаупін төмендетуге көмектесетінін атап өтеді. Әсіресе созылмалы аурулары бар азаматтар, жүкті әйелдер, егде жастағы адамдар және басқа да қауіп топтарына жататын тұрғындар үшін тұмаудың алдын алу маңызды.

Тұмау мен ЖРВИ-ден қалай қорғануға болады

Денсаулық сақтау министрлігі маусымдық респираторлық инфекциялардың таралу қаупін азайту үшін қарапайым сақтық шараларын ұстануға кеңес береді.

Атап айтқанда:

  • Қолды сабынмен жиі жуу, әсіресе қоғамдық орындардан келгеннен кейін жеке гигиена талаптарын сақтау;
  • Үй мен жұмыс бөлмелерін тұрақты түрде желдету;
  • Жөтелгенде немесе түшкіргенде ауыз бен мұрынды майлықпен немесе шынтақтың ішкі бөлігімен жабу;
  • ЖРВИ белгілері пайда болған жағдайда мүмкіндігінше басқа адамдармен жақын қарым-қатынасты шектеу;
  • Дене қызуы жоғарылаған, жағдайы нашарлаған немесе ауру белгілері күшейген жағдайда дәрігерге жүгіну.

Министрлік тұрғындарды өз денсаулығына жауапкершілікпен қарауға және сырқат белгілері пайда болған кезде уақытылы медициналық көмек алуға шақырады. Қазіргі уақытта Қазақстанда тұмау мен ЖРВИ-ге қатысты эпидемиологиялық жағдайға тұрақты мониторинг жүргізіліп жатыр.

Зарина Қаһарман

Зарина Қаһарман – журналист, Tizgin.kz ақпарат-сараптама порталының тілшісі. Журналистика саласында 10 жылдан аса тәжірибесі бар. Еңбек жолын Өскемендегі облыстық «Менің өлкем» жекеменшік газетінде тілші болып бастап, 2018 жылы Baq.kz ақпараттық порталында, 2019 жылы «ҚазАқпарат» халықаралық ақпараттық агенттігінде тілші қызметін атқарған. Журналистикадан бөлек, кейінгі жылдары психоанализ саласында кеңесші қызметімен айналысады.
Back to top button