Жаңа оқу жылынан бастап мектептерде қазақ тілінен диктант, мазмұндама, шығарма және басқа да шығармашылық жұмыстарға басымдық беріледі. Математика пәнінен бақылау жұмыстары қайта енгізіліп, оқушылардың дәптерде орындаған тапсырмалары бағаланады, деп хабарлайды Tizgin.kz.
Әр жазба жұмысына нақты бағалау өлшемі әзірленеді
Оқу-ағарту министрі Жұлдыз Сүлейменованың айтуынша, оқушылар тапсырмаларды дайын парақтарға ғана орындамай, дәптерге өз қолымен жазатын болады. Мұғалім баланың дәптерде орындаған жұмысын тексеріп, оған белгіленген талаптарға сәйкес баға қояды.
«Қазақ тілінен диктант, мазмұндама, шығарма және басқа да шығармашылық жұмыстарды қайта енгізіп жатырмыз. Бұдан бөлек, математикадан бақылау жұмыстары болады. Енді оқушының дәптерде орындаған жұмысына жеке баға қойылады. Бала тапсырманы дәптерге жазады, ал мұғалім сол жұмысты тексереді», – деді министр.
Оның сөзінше, әр тапсырманы бағалаудың нақты әрі баршаға түсінікті өлшемдері белгіленеді. Мәселен, диктант пен мазмұндамаға баға қою кезінде мұғалім қандай талаптарды басшылыққа алатыны алдын ала айқындалады.
«Диктантты немесе мазмұндаманы қалай бағалау керектігіне қатысты критерийлер нақты белгіленеді. Яғни әр тапсырманың өзіндік бағалау өлшемі болады», – деді Жұлдыз Сүлейменова.
Диктант – мұғалім оқыған мәтінді оқушының тыңдап, қатесіз жазуына арналған жұмыс. Ол баланың сауатты жазуын, емле мен тыныс белгілерін дұрыс қолдануын тексереді.
Мазмұндама – оқылған немесе тыңдалған мәтіннің мазмұнын оқушының өз сөзімен жазбаша жеткізуі. Мұнда мәтінді түсіну, негізгі ойды сақтау, оқиғаны ретімен баяндау және сөйлемдерді байланыстыра білу қабілеті бағаланады.
Шығарма – белгілі бір тақырып бойынша оқушының өз ойын дербес әрі жүйелі түрде жазуы. Бұл жұмыс баланың сөздік қорын, шығармашылық ойлауын, мәтін құрастыру және пікірін дәлелдеу дағдыларын көрсетеді.
Математикадан бақылау жұмысы – оқушының өткен тақырыптарды қаншалықты меңгергенін анықтайтын жазбаша тексеру. Бағалау кезінде есептің дұрыс жауабы ғана емес, оны шығару жолы мен амалдарды дұрыс қолдануы да ескеріледі.
Ал дәптердегі жұмысты бағалау оқушының тапсырманы өз бетінше орындауын, жазу сауаттылығын және оқу материалын меңгеру деңгейін бақылауға мүмкіндік береді. Баға мұғалімнің жеке көзқарасына емес, алдын ала белгіленген ортақ талаптарға сүйеніп қойылуға тиіс.
