Биылғы шілдеде Грузия алғаш рет Қазақстаннан 5,5 мың тонна мұнай импорттады. Қазақстан мұнайы Ресейден жеткізілген шикізатқа қарағанда тоннасына 166 долларға қымбат болған, деп хабарлайды Tizgin.kz.
Қазақстан мұнайы Ресей шикізатынан қымбат болды
Грузия Қазақстаннан 5,5 мың тонна мұнайды 3,2 млн долларға сатып алған. Осылайша қазақстандық мұнайдың әр тоннасы шамамен 582 доллардан сатылған.
Салыстыру үшін айтсақ, сол айда Грузия Ресейден 87,4 мың тонна мұнай импорттап, оған 36,4 млн доллар жұмсаған. Ресей мұнайының бір тоннасы шамамен 416 долларға түскен. Демек, қазақстандық шикізаттың әр тоннасы 166 долларға қымбат болған. Бұл туралы мұнай-газ саласының сарапшысы Нұрлан Жұмағұлов хабарлады.
Грузияның Қазақстан мұнайына қызығушылығы Ресей шикізатына қойылатын шектеулермен байланысты болуы мүмкін. 2027 жылғы 25 қаңтардан бастап елдегі жалғыз мұнай өңдеу кәсіпорны – Кулеви МӨЗ-і Еуроодақ санкцияларына ілікпеу үшін Ресей мұнайын өңдеуден толық бас тартуға тиіс.
Осыған байланысты зауыт қазірден бастап жеткізушілер қатарын кеңейтіп жатыр. Тамызда кәсіпорын Ливиядан мұнай импорттауды жоспарлаған. Бұған дейін Кулеви МӨЗ-і Қазақстан мен Түрікменстанның мұнайына да қызығушылық танытқан.
Қазақстан мұнайына Еуропаға шығатын жаңа жол ашылуы мүмкін
Нұрлан Жұмағұловтың пайымынша, жеткізілімді жеңілдету үшін Грузия биыл мамырда Әзербайжанмен Баку–Супса мұнай құбырын қайта іске қосу туралы келісімге келген болуы мүмкін. Құбырдың жылдық өткізу қуаты 6 млн тоннаға жетеді.
Қазір мұнайды теміржол арқылы тасымалдау қымбатқа түседі. Ал Баку–Супса құбырының қайта іске қосылуы Орталық Азия мұнайын Грузия арқылы Еуропаға жеткізетін бағытты жандандыруы ықтимал.
Бұл бағыт Қазақстан үшін де маңызды. Мұнай Каспий теңізі арқылы Әзербайжанға, одан әрі құбырмен Грузияның Қара теңіз жағалауына жеткізіледі. Осылайша Қазақстанның дәстүрлі экспорт жолдарына тәуелділігін азайтатын тағы бір балама маршрут қалыптасуы мүмкін.
