Астанада өтіп жатқан Astana Media Week 2026 мерейтойлық медиа апталығының екінші күнінде «Үздік баспасөз қызметі» және «Үздік баспасөз хатшысы» номинацияларының жеңімпаздары марапатталды, деп хабарлайды Tizgin.kz.
Қай баспасөз қызметтері мен хатшылары үздік атанды
Мемлекеттік коммуникация саласының өкілдерін марапаттау рәсімінде «Үздік баспасөз қызметі» номинациясы бойынша екі ұжым жеңімпаз атанды. Олар – Қазақстан Республикасының Қаржылық мониторинг агенттігінің баспасөз қызметі мен Ақтөбе облысы әкімінің баспасөз қызметі.
Ал «Үздік баспасөз хатшысы» номинациясында Экология және табиғи ресурстар министрлігінің баспасөз қызметінің басшысы Айнаш Қойшыбаева мен Түркістан облысы әкімінің баспасөз қызметінің басшысы Мира Сүлейменова марапатталды.
Мемлекеттік органдар мен БАҚ байланысы талқыланды
Медиа апталық аясында «Қазақстанның ақпараттық саясатындағы жаңа ережелер» тақырыбында сарапшылар кездесуі де өтті.
Талқылауға Мәдениет және ақпарат бірінші вице-министрі Қанат Ысқақов, Шығыс Қазақстан облысы әкімінің баспасөз қызметінің басшысы Лаура Жақыпова, медиаменеджер Асқар Джалдинов, «Qazcontent» басқарма төрағасы Әділ Сейфуллин және «Власть» интернет-журналының Астанадағы бюро жетекшісі Тамара Вааль қатысты.
Кездесуде мемлекеттік ақпараттық саясатты жүргізу тәсілдері, мемлекеттік органдардың бұқаралық ақпарат құралдарымен өзара іс-қимылы және баспасөз қызметтерінің жұмысы сөз болды. Сондай-ақ қатысушылар қоғаммен байланыстың тиімділігін арттыру мәселелерін талқылады.
