Қазақстанның Даму банкі юаньмен 10 жылға дейін қарыз алды

Қазақстанның Даму банкі шығарған жалпы сомасы 3,7 млрд юань болатын екі димсам-облигация Astana International Exchange (AIX) биржасының ресми тізіміне енгізілді, деп хабарлайды Tizgin.kz.

Бірінші шығарылым – 2 млрд юань

AIX құжатына сәйкес, алғашқы шығарылымның көлемі 2 млрд юань болды. Облигациялар бес жылға шығарылған және 2031 жылғы 9 қыркүйекте өтеледі. Бағалы қағаздардың жылдық купон мөлшерлемесі – 2,25 пайыз. Ал орналастыру бағасы номинал құнының 99,533 пайызына тең.

Облигация жеңілдікпен орналастырылғандықтан, оны өтеу мерзіміне дейін ұстайтын инвестордың есептік жылдық табыстылығы купон мөлшерлемесінен сәл жоғары – шамамен 2,35 пайыз болады. Бұл есепке комиссиялар мен салықтар кірмейді.

10 жылдық облигацияның табыстылығы жоғары

Екінші шығарылымның көлемі 1,7 млрд юаньға жетеді. Оның айналым мерзімі – он жыл, ал өтеу күні 2036 жылғы 9 қыркүйекке белгіленген. Бұл облигациялар бойынша жылдық купон мөлшерлемесі 2,75 пайызды құрайды. Қағаздар номинал құнының 98,288 пайызына орналастырылған. Орналастыру бағасы мен жыл сайын төленетін купондарды ескергенде, облигацияны өтеу мерзіміне дейін ұстайтын инвестордың есептік табыстылығы жылына шамамен 2,95 пайыз болады. Комиссиялар мен салықтар бұл есепке қосылмаған.

Димсам-облигациялар – Қытайдың материктік бөлігінен тыс жерде шығарылатын, юаньмен номинацияланған борыштық бағалы қағаздар. Мұндай құралдар эмитентке қаржы тартатын валюталарды әртараптандыруға және юань нарығындағы салыстырмалы түрде төмен мөлшерлемелерді пайдалануға мүмкіндік береді.