Қазақстан Тәуелсіздігінің 35 жылдығына орай жалпы жүлде қоры 30 миллион теңгені құрайтын республикалық патриоттық әндер байқауы жарияланды. Оған еліміздің барлық өңірінен ақындар мен композиторлар, сондай-ақ шығармашылық жолын енді бастаған авторлар қатыса алады, деп хабарлайды Tizgin.kz порталы Мәдениет және ақпарат министрлігіне сілтеме жасап.
Байқауға кімдер қатыса алады
Байқаудың мақсаты – Отанға, туған жерге деген сүйіспеншілікті, ұлттық құндылықтар мен ел бірлігін дәріптейтін жаңа әндерді таныту. Сонымен қатар талантты авторларды анықтап, заманауи патриоттық әндер қорын толықтыру көзделген.
Байқауға кәсіби ақындар мен композиторлардан бөлек, шығармашылық жолын жаңадан бастаған авторлар да қатыса алады. Негізгі талап – ұсынылатын ән бұрын еш жерде жарияланбаған және орындалмаған болуы керек.
Шығармалар үш бағыт бойынша қабылданады:
- Салтанатты патриоттық әндер – жігерлі, марш ырғағындағы туындылар;
- Лирикалық патриоттық әндер – Отан мен туған жерге деген сүйіспеншілікті бейнелейтін шығармалар;
- Заманауи патриоттық әндер – қазіргі музыкалық бағыттарда жазылған туындылар.
Қатысушылар бір немесе бірнеше бағыт бойынша ән ұсына алады.
Байқау жұмыстарын композиторлар, ақындар және музыка саласының мамандарынан құралған сарапшылар кеңесі бағалайды. Бағалау кезінде әннің әуені мен мәтінінің сапасына, авторлық идеяның ерекшелігіне, көркемдік деңгейіне және тыңдарманға әсеріне назар аударылады.
Сарапшылар кеңесінің мүшесі, ақын Қалқаман Сариннің айтуынша, байқау арқылы ұлттық болмысты дәріптейтін, бүгінгі заманның рухына сай жаңа патриоттық әндердің дүниеге келуіне мүмкіндік жасалмақ.
Жеңімпаздарға қанша миллион теңге беріледі
Байқаудың жалпы жүлде қоры 30 миллион теңгені құрайды. Қаражат демеушілер есебінен бөлінген.
Жүлделер мынадай тәртіппен үлестіріледі:
- Бас жүлде – 6 миллион теңге;
- I орын – әрқайсысы 4 миллион теңгеден үш жүлде;
- II орын – әрқайсысы 3 миллион теңгеден үш жүлде;
- III орын – әрқайсысы 1 миллион теңгеден үш жүлде.
Осылайша, байқау қорытындысы бойынша барлығы 10 жүлде табысталады.
Өтінімдер қашанға дейін қабылданады?
Байқауға қатысу үшін өтінімді 2026 жылғы 5 желтоқсанға дейін khabar.kz/konkurs сайты арқылы жіберу қажет.
Жеңімпаздар Қазақстан Республикасының Тәуелсіздік күні қарсаңында жарияланады.
Жобаның бас ақпараттық серіктесі – «Хабар» агенттігі» АҚ.
