Украина президенті Владимир Зеленский елдің ұшқышсыз аппараттарды қолдану ауқымы ұлғайған сайын Ресейдің әуе кеңістігі қауіпті бола түсетінін мәлімдеді. Ол халықаралық әуе компанияларын, сақтандыру ұйымдары мен шетел үкіметтерін бұл қатерді ескеруге шақырды, деп хабарлайды Tizgin.kz.
Әуе компанияларына ескерту
Зеленский 1 қыркүйектегі кешкі үндеуінде Ресейдің әуе кеңістігін пайдаланатын компаниялар мен Мәскеу, Санкт-Петербург және өзге қалалардағы ірі әуежайларға рейс орындайтын тасымалдаушыларға ескерту жасады. Оның сөзінше, Украина азаматтық ұшақтарға қауіп төндірмейді. Алайда Ресей аспанында украин дрондарының көбеюі әуе тасымалдаушылары мен сақтандыру компаниялары есепке алуға тиіс жаңа қатер қалыптастырып отыр.
«Ресейдің әуе кеңістігі іс жүзінде жабылады. Ресей бастаған соғыс өз аспанын жауып жатыр», – деді Зеленский.
Ресей әуежайларындағы қауіп
Украина президенті Киевтің алыс қашықтыққа бағытталған шабуылдары әскери нысандарға және Ресейдің соғыс жүргізуіне қызмет ететін инфрақұрылымға жасалатынын айтты. Олардың қатарында әскери әуежайлар, зымыран бөлімдері, мұнай өңдеу зауыттары мен энергетикалық нысандар бар.
Ресейдегі азаматтық авиация соғыс басталғалы жұмысын жалғастырып келеді. Дегенмен дрон шабуылдары кезінде Мәскеу мен басқа қалалардағы әуежайлардың қызметі жиі уақытша тоқтатылады. Ал Украинаның әуе кеңістігі 2022 жылғы 24 ақпаннан бері азаматтық ұшақтар үшін жабық.
Зеленскийдің айтуынша, Украина сыртқы істер министрлігі халықаралық ұйымдарға Ресейдің әуе кеңістігіндегі қауіптер туралы ақпарат береді. Мәлімдеме Киев пен Украинаның өзге қалалары бірнеше күн қатарынан әуе шабуылына ұшырағаннан кейін жасалды.
