Кеше әлеуметтік желіде қаралым мен сыйлық үшін мысықты қинап, қорқытып, азаптаған әкесі мен қызының видеосы тараған болатын. Полиция қызметкерлері стримерді ұстап, айыппұл салды, деп хабарлайды Tizgin.kz.
Жамбыл облысының тұрғыны болып шықты
21 қыркүйекте TikTok стримде ер адамның мысықты қинаған видеосы тарады. Кадрдан азаматтың мысықты құлағынан тістеп тұрғанын көруге болады. Ол оқырмандар 1000 роза жіберсе ғана мысықты босататынын айтқан.
«Полиция ер адамды ұстады. Ол Жамбыл облысының 43 жастағы тұрғыны болып шықты. Оған әкімшілік айыппұл салынды», – деп жазылған хабарламада.
Мысық тірі, аман-есен.
«Ақша үшін жануарды қинауды тоқтатыңдар»
Бұл видеоны көрген оқырмандар ашуланып, түрлі пікір жазған.
«Қазақстан заңнамасында жануарларға қатыгездікпен қарауға жауапкершілік қарастырылған. Видеоны сақтап қойыңдар: мұндай әрекетке тиісті органдардың назарын аудару керек. Жануарды ақша үшін қинауды дереу тоқтатыңдар! Тірі жанның азабын көрерменнің көңілін көтеру үшін пайдалануға болмайды», – деп жазды Әйгерім есімді оқырман.
