Бүгін Астана қаласында Жамбыл облысының «Асқақ рухты Әулиеата» атты көрме-жәрмеңкесі өтеді, деп хабарлайды Tizgin.kz.
Көрмеге Жамбыл өңірінің белгілі суретші-мүсіншісі Қали Қораласбаев та қатысып, табиғи тас пен ағаштан жасалған бірқатар туындысын көпшілік назарына ұсынды.
Тастан қашалған дала бейнесі
Қали Қораласбаев көрмеге табиғи тастан жасалған «Дала қорғаны. Қолбасшы», «Көктем», «Батыр», «Дала үні», «Құрбылар», «Ой», «Қорқыттың зары», «Болашақ», «Кісен ашқан» және «Ұйқыдағы жауынгер» атты мүсіндерін алып келген.
Шебердің шығармаларында дала тарихы, ұлттық дүниетаным, адам болмысы мен қазақ мәдениетінің рухани сарындары көрініс табады. Әсіресе туындылардың атауынан-ақ автордың тарихи жады мен дала философиясына ден қойғанын аңғаруға болады.
Ағаштан жасалған туындылар да бар
Мүсінші таспен ғана шектелмеген. Көрмеге оның қара ағаштан қашалған «Абыз» және «Дала үндестігі» атты еңбектері де қойылды.
«Асқақ рухты Әулиеата» көрме-жәрмеңкесі «Creative Aimaq» республикалық жобасы аясында өтіп жатыр. Шара Жамбыл облысының шығармашылық әлеуетін таныстырып, өңір өнерпаздарының еңбектерін кең аудиторияға ұсынуды көздейді.
