Әскери-теңіз күштері штабының бастығы мен төрт командир ұсталды – Каспийдегі трагедия

«Хазар Қорғаны – 2026» оқу-жаттығуы кезінде әскери қызметшілердің қаза табуына байланысты Қарулы күштердің бес лауазымды тұлғасы ұсталды. Олардың қатарында Әскери-теңіз күштері штабының бастығы, екі әскери бөлімнің, теңіз жаяу әскері ротасының және катердің командирлері бар, деп хабарлайды Tizgin.kz.
Барлығы күдікті деп танылып, Ақтау қаласындағы уақытша ұстау изоляторына қамалды.
Кімдер ұсталды және оларға қандай күдік келтірілген
Ұсталғандар қызметке салғырт қарауға және кеме жүргізу қағидаларын бұзуға байланысты ауыр зардаптарға әкеп соққан қылмыстық құқық бұзушылықтар жасады деген күдікке ілінген.
Олар:
- Әскери-теңіз күштері штабының бастығы — бас қолбасшының бірінші орынбасары;
- екі әскери бөлімнің командирі;
- теңіз жаяу әскері ротасының командирі;
- катер командирі.
Бес күдікті де Ақтау қалалық полиция басқармасының уақытша ұстау изоляторына қамалған. Сотқа дейінгі тергеп-тексеруді Ішкі істер министрлігінің әскери-тергеу бөлімшесі жүргізіп жатыр.
«Қайсар» катерінен түсу кезінде не болған
Тергеу дерегінше, 24 қыркүйекте Ақтаудан 43 шақырым жердегі Каспий теңізінің жағалауында оқу-жаттығу өткен. Қолайсыз ауа райы жағдайында «Қайсар» катерінен жеке құрамды түсіру кезінде әскери қызметшілерді теңізге алып кеткен.
Тергеу барысында оқу-жауынгерлік тапсырманы ұйымдастыру және орындау кезінде шешімдердің қалай қабылданғаны, қауіпсіздік талаптарының сақталуы және гидрометеорологиялық жағдайдың ескерілуі тексеріліп жатыр. Сондай-ақ катердің техникалық жай-күйі, оқу-жаттығуды өткізуге және жеке құрамның қауіпсіздігіне жауапты лауазымды тұлғалардың әрекеттері зерделенуде.
Қажетті тергеу және процестік іс-шаралар жалғасып жатыр. Барлық күдіктінің әрекетіне заңда белгіленген тәртіппен құқықтық баға беріледі.
Сотқа дейінгі тергеп-тексеру барысы Ішкі істер министрлігі мен Бас прокуратураның ерекше бақылауында.