Мемлекет басшысы Қасым-Жомарт Тоқаев Қазақстан ұлттық құрамасын VI Дүниежүзілік көшпенділер ойындарында табысты өнер көрсетуімен құттықтады, деп хабарлайды Tizgin.kz.
Бұл туралы президенттің кеңесшісі – баспасөз хатшысы Айбек Смадияров мәлімдеді.
Президент спортшылардың табандылығын атап өтті
Қасым-Жомарт Тоқаев ұлттық құраманың жоғары нәтижеге тайсалмас табандылықтың, жанқиярлық еңбек пен мұқалмас ерік-жігердің арқасында жеткенін айтты.
Мемлекет басшысы чемпиондар мен жүлдегерлерге, бапкерлер құрамына, сондай-ақ спортшылардың дайындығына үлес қосқан барша маманға шынайы ризашылығын білдірді.
«Қазақстанның халықаралық беделін асқақтатады»
Президенттің айтуынша, мұндай ерен жетістіктер Қазақстанның ұлттық спорт түрлері дамыған ел ретіндегі халықаралық беделін арттыра түседі.
Қасым-Жомарт Тоқаев қазақстандық спортшыларға алдағы уақытта да ең беделді сайыстарда биік белестерді бағындыра беруге тілектестік білдірді.
