Олимпиада чемпионы Серік Сәпиев «Астана» халықаралық қаржы орталығында Enzo Ltd. компаниясын тіркеді. Ол компанияның жалғыз акционері әрі басшысы ретінде көрсетілген, деп хабарлайды Tizgin.kz порталы АХҚО-ның Қаржылық қызметтер көрсетуді реттеу жөніндегі комитетінің (AFSA) ресми сайтына сілтеме жасап.
Компания немен айналысады
Enzo Ltd. 2026 жылғы 11 қыркүйекте жеке компания ретінде тіркелген. Тізілімдегі мәртебесі – белсенді. Негізгі қызмет бағыты «холдингтік компаниялардың қызметі» деп көрсетілген. Бұл өзге компаниялардың акцияларын немесе қатысу үлестерін иеленумен байланысты.
Компанияның заңды мекенжайы Астананың Есіл ауданындағы Мәңгілік Ел даңғылы, 55/16 мекенжайында орналасқан.
Жалғыз акционер әрі басшы
Ресми дерекке сәйкес, Серік Сәпиев Enzo Ltd. компаниясының директоры және бас атқарушы директоры қызметтерін атқарады. Сондай-ақ оған компания атынан қол қою өкілеттігі берілген.
Компанияның 100 жай акциясы бар. Әрқайсысының құны – 3 мың теңге, жалпы құны – 300 мың теңге. Акционерлер тізімінде тек Серік Сәпиев көрсетілген.
