Қазақстандық ескекшілер Владислав Яковлев пен Иван Чернухин Жапонияда өтіп жатқан Азия ойындарында чемпион атанды. Олар ел қоржынына сегізінші алтын медальді салды, деп хабарлайды Tizgin.kz.
Қазақстандық жұп қарсыластарынан озды
Академиялық ескек есуден ерлер арасындағы рөлшісіз жұптық сында Владислав Яковлев пен Иван Чернухин үздік нәтиже көрсетті. Қазақстандықтар А финалында мәреге 6 минут 25,13 секундта жетіп, алтын медаль жеңіп алды.
Күміс жүлде қытайлық Цао Чуань мен Янь Мэншуайға бұйырды. Олар жеңімпаздардан 2,09 секундқа қалып қойды.
Үздік үштікті Өзбекстан өкілдері Максим Голубев пен Алишер Турдиев түйіндеді. Олардың нәтижесі қазақстандық жұптан 7,21 секундқа баяу болды.
Қазақстан қоржынында – 22 медаль
Бұл жеңіс Қазақстан құрамасының осы Азия ойындарындағы алтын медаль санын сегізге жеткізді.
Осы нәтижеден кейін ел қоржынында 22 жүлде: сегіз алтын, алты күміс және сегіз қола медаль бар.
Жапонияның Айти префектурасы мен Нагоя қаласында өтіп жатқан Азиада-2026 жарыстары 4 қазанда аяқталады.
