Almaty Super Ski жобасын қоғамдық талқылау барысында ҚР Ғылым және жоғары білім министрілігінің өкілі Ержан Күлдеев ғылыми зерттеулер нәтижесімен бөлісті, деп хабарлайды Tizgin.kz.
ЗЕРТТЕУ НӘТИЖЕСІ ҚАНДАЙ
Оның айтуынша, жоба бойынша таудағы қар жамылғысының жағдайы, қар қоры және климаттық сипаттамалары зерттелген. Зерттеу нәтижесі бойынша кейінгі 10 жылда қар жамылғысының айтарлықтай өзгерісі байқалмаған.
Сондай-ақ жобаның мұздықтарға ықтимал әсері қарастырылған. Ұсынылған деректерге сәйкес, мұздықтар зерттеліп отырған аумақтың сыртында орналасқан. Сондықтан жобаны іске асыру мұздықтардың жағдайына тікелей әсер етпейді.
МИНИСТРЛІК ӨКІЛІ НЕ ДЕДІ
Ержан Күлдеев құрылыс жүргізілетін аумақта заңнамаға сәйкес алдын ала археологиялық қазба жұмыстары жүргізілетінін атап өтті.
Барлық учаске толық зерттеліп, құжаттандырылғаннан кейін ғана құрылыс-монтаждау жұмыстарын жүргізуге рұқсат беріледі, – деді ол.
Оның айтуынша, тұрақты экологиялық бақылау болған жағдайда жобаны іске асыру экологиялық тұрғыдан рұқсат етіледі.
Жүргізілген зерттеу нәтижелері табиғатты қорғау талаптары мен тұрақты мониторинг шаралары сақталған жағдайда жобаны іске асыру үшін қарастыруға болатынын көрсетеді, – деді ол.
