Денсаулық сақтау министрлігі “Бірыңғай терезе” қағидатына сәйкес дәрілік заттар мен медициналық бұйымдарды мемлекеттік тіркеу жөніндегі пилоттық жобаға өзгерістер жобасын әзірледі, деп хабарлайды Tizgin.kz.
МИНИСТРЛІК ДАЙЫНДАҒАН ӨЗГЕРІС
Министрлік медициналық бұйымдар мен дәрілік заттарды тіркеу тәртібіне оларды Қазақстан нарығына жіберу мерзімдерін едәуір қысқартуға бағытталған өзгерістер дайындады.
Ведомство атап өткендей, мәселе Қазақстан Республикасы жасанды интеллект және цифрлық даму министрлігімен бірлесе қолға алынатын “Бірыңғай терезе” қағидаты бойынша композиттік мемлекеттік қызметті енгізу жөніндегі пилоттық жобаны жетілдіру туралы болып отыр.
МАҚСАТЫ НЕ
Бастаманың мақсаты сол, пациенттердің халықаралық бағалаудан өткен және әлемнің жетекші елдерінде қолданылатын заманауи, сапалы және қауіпсіз дәрі-дәрмектер мен медициналық технологияларға жылдам қол жеткізуін қамтамасыз ету.
Атап айтқанда, көзделеді:
- дәрілік заттарды преквалификациялау бағдарламасы шеңберінде Дүниежүзілік денсаулық сақтау ұйымымен бірлескен тіркеу рәсімін жүргізу;
- АҚШ, Ұлыбритания, Еуропалық Одақ мемлекеттері, Швейцария, Корея Республикасы, Сауд Арабиясы, Сингапур, Канада, Жапония және Австралияны қоса алғанда, қатаң реттеуші жүйесі бар елдердің реттеуші органдарының шешімдерін тану тетіктерін пайдалану;
- ce marking және медициналық бұйымдарды реттеушілердің халықаралық форумына (imdrf) қатысушы елдердің құжаттарын қоса алғанда, халықаралық танылған сапа және қауіпсіздік сертификаттары бар медициналық бұйымдарға жедел сараптама енгізу.
Ұсынылған өзгерістер жекелеген медициналық бұйымдарға сараптама жүргізу мерзімдерін 15 жұмыс күніне дейін қысқартуға мүмкіндік береді.
ДӘРІНІҢ САПАСЫ ТЕКСЕРІЛЕДІ
Бұл денсаулық сақтау жүйесіне заманауи медициналық технологияларды жедел енгізуге, пациенттер үшін инновациялық өнімдердің қолжетімділігін арттыруға және адал өндірушілер үшін әкімшілік кедергілерді азайтуға мүмкіндік береді.
Министрлікте рәсімдерді жеделдету бақылауды әлсіретуді білдірмейтіні көрсетілген. Барлық дәрілік зат пен медициналық бұйымдар әлі де Қазақстан Республикасының заңнамасына сәйкес сапасы мен қауіпсіздігіне міндетті тексеруден өтетін болады.
