Қазақстанның бұрынғы денсаулық сақтау вице-министрі Олжас Әбішев үш жыл бұрын өзі мен экс-министр Елжан Біртановтың үстінен қозғалған даулы істі қайта қарауды талап етіп отыр. Сол үшін ол Бас прокуратураға жүгінді, деп хабарлайды Tizgin.kz тілшісі.
ӘБІШЕВТІҢ ҰСТАНЫМЫ
Олжас Әбішевтің айтуынша, айыптау тарапының негізгі уәждерін жоққа шығаратын жаңа дәлелдер табылған. Ол бұл жайлы Facebook-тегі парақшасында жариялаған видеоүндеуде айтып, бүкіл процес жалғыз ғана куәгердің сөзіне сүйене құрылғанын сынға алды. Оның сөзінше, сол куәгердің өзі қол қойған құжаттар сотта айтылған мәлімдемелеріне мүлде кереғар.
ОЛАР НЕ ҮШІН СОТТАЛДЫ
Қылмыстық істің өзегі – Хорватияның Ericsson Nikola Tesla компаниясы әзірлеген Денсаулық сақтау министрлігінің цифрлық платформасы. Тергеу нұсқасына сай, Елжан Біртанов пен Олжас Әбішев аталған жүйеде техникалық ақаулар бола тұра оны қабылдап, қызметтік өкілеттігін асыра пайдаланған. Алайда сотталған екеуі бұл айыппен келіспейді.
2023 жылы 10 ақпанда апелляциялық сот үкімді күшінде қалдырып, Біртанов пен Әбішевті мемлекеттік қызметте лауазым атқару құқығынан өмір бойына айырған. Бұған қоса, олар мемлекетке келтірілген 1,3 миллиард теңге шығынды өтеуге міндеттелген.
АРЫЗ НЕ ЖАЙЛЫ
Әбішев платформаның тек енгізіліп қана қоймай, қазір де жұмыс істеп тұрғанын алға тартады. Осыған байланысты ол мен бұрынғы басшысы Біртанов Бас прокуратураға жаңа мән-жайларға байланысты істі қайта қарау жөнінде өтініш жолдаған.
Экс-шенеуніктер енді істің қайта қаралуына және жаңа ашылған жайттардың өздерінің абыройын ақтауға сеп боларына үміт артады.
