Алматыда такси қызметінде жұмыс істейтін кейбір борышкерлердің нақты табысын жасырып жүргені анықталған. Олар ресми түрде жұмыссыз ретінде тіркелгенімен, іс жүзінде цифрлық платформалар арқылы, соның ішінде Яндекс Go сервисін пайдаланып, табыс табады, деп жазады Информбюро.
Құқық қорғау органдарының мәліметінше, 2025 жылы осындай 110 дерек тіркелген. Оның 57-сі бойынша әкімшілік жауапкершілік қолданылса, 10 факті бойынша сотқа дейінгі тергеп-тексеру басталған.
Мәселені жүйелі түрде шешу мақсатында Алматы қаласының прокуратурасы мен Yandex Qazaqstan өзара ынтымақтастық туралы меморандумға қол қойды. Құжатта заң аясында ақпарат алмасу, деректерді жедел ұсыну және алимент бойынша берешекті жасыру фактілерін анықтау мен алдын алу тетіктері қарастырылған.
Келісімге сәйкес, прокурорлар жүйелі әрі заңды ақпараттық өзара іс-қимыл жасап, деректерді алмасады. Компания алимент бойынша берешекті қалыптастыру және табысты жасыру фактілерін анықтауға көмектеседі.
