АҚШ президенті The New York Times газетін «өтірік айтты» және «радикалды солшыл Демократиялық партияның виртуалды үніне айналды» деп айыптады, деп хабарлайды DW.
АҚШ президенті Дональд Трамп The New York Times газетіне қарсы 15 миллиард доллар (12,7 миллиард еуро) көлемінде ар-намысын қорғау туралы талап-арыз түсіретінін мәлімдеді. Ол басылымды «радикалды солшыл Демократиялық партияның виртуалды рупоры» деп айыптап отыр. Трамп бұл жөнінде Truth Social әлеуметтік желісінде жазды.
«Times газеті ондаған жылдар бойы сіздердің сүйікті президенттеріңізге (ЯҒНИ, МАҒАН!), менің отбасым мен бизнесіме, “Америка бәрінен бұрын” қозғалысына, MAGA-ға және жалпы елімізге қатысты өтірік таратумен айналысты», — деді Трамп. Сондай-ақ ол басылымның редакциялық алқасын Демократиялық партия кандидаты Камала Харристі қолдағаны үшін сынға алды. Оның айтуынша, бұл «сайлау тарихындағы ең ірі заңсыз үлес» болған.
«The New York Times ұзақ уақыт бойы маған өтірік айтуға, жала жабуға және абыройымды түсіруге жол беріп келді. Бұл енді ТОҚТАЙДЫ», — деп мәлімдеді АҚШ президенті. Ол талап-арызды Флорида штатында беретінін қосты.
Бұған дейін Трамп өзіне тиесілі деп көрсетілген, қаржыгер Джеффри Эпштейнге 20 жылдан астам уақыт бұрын жіберілді делінген құттықтау ашықхаты жарияланған соң да сотқа жүгінетінін ескерткен.
БАҚ-пен сот даулары
Бұған дейін Ақ үй басшысы бірқатар медиаға, соның ішінде CBS пен ABC арналарын сотқа берген. Кейін ол істер бірнеше миллион доллар көлемінде келісіммен аяқталған. Алайда сыншылар мұндай қадамдарды сөз бостандығына қол сұғушылық деп бағалағанын dpa агенттігі хабарлады.
Конгрессте 25 маусымда сөйлеген сөзінде АҚШ-тың Ғаламдық медиа агенттігінің (USAGM) арнайы кеңесшісі Кэри Лейк Трамп әкімшілігі «жалған насихат таратады және біржақты» деп есептеген БАҚ-қа бөлінетін қаржыны «түгелдей қысқарту» туралы президенттің тапсырмасын еске салды.
