Істі алқа соты қарады. Манат Сарбасов 12 жылға бас бостандығынан айырылды, деп хабарлайды Tizgin.kz порталы Информбюроға сілтеме жасап.
Шымкент қаласындағы қылмыстық істер бойынша арнайы ауданаралық сотта сыбайлас жемқорлық және бюджеттік қаражатты ұрлау ісі бойынша үкім жарияланды. Іс материалында бұрынғы ҰҚК қызметкерлері мен Денсаулық сақтау басқармасының басшылары аталған.
Істің басты фигуранты, Шымкент қаласы ҰҚК департаментінің бұрынғы бірінші орынбасары Манат Сарбасов пара алу және қылмыстық табыстарды заңдастыру фактілері бойынша кінәлі деп танылды. Сот оны орта қауіпсіздігі бар мекемеде 12 жылға бас бостандығынан айыруға үкім етті. Сонымен қатар, оған ҰҚК подполковнигі деген атағы алынған, екі бөлмелі пәтері мен Toyota Land Cruiser автокөлігі тәркіленген. Сондай-ақ, Сарбасов пара сомасын – 70 млн теңгені өтеуге міндеттелді.
Тергеу мәліметтері бойынша, 2019-2020 жылдары Сарбасов кәсіпкер Эльмира Дүйсенқызынан колледжге қолдау көрсеткені үшін 45 млн теңге және жеке мектепке көмек көрсеткені үшін тағы 70 млн теңге алған. Айыптау тарабының айтуынша, алынған қаражатты ол екі пәтер мен жол талғамайтын көлік сатып алу арқылы «кепілдендірген», ал бір пәтерді жөндегеннен кейін үш есеге жуық қымбатқа сатқан.
Сот залында оның қасында тағы төрт адам отырды: Шымкент қаласы Денсаулық сақтау басқармасының бұрынғы басшысы Темірхан Варзилов, оның орынбасары Чингис Джанабаев, кәсіпкер Ерлан Тышқанбаев және ҰҚК майоры Айдос Сраилов.
Прокурорлық тараптың нұсқасы бойынша, Варзилов, Джанабаев және Тышқанбаев медициналық жабдықтарды жеткізу мен маска сатып алу кезінде бюджеттік қаражатты жымқыруға қатысқан. Мемлекетке келтірілген жалпы шығын 130 млн теңгеден асты.
Прокурор Варзилов пен Джанабаевқа 8 жыл, ал Тышқанбаевқа 7 жылға бас бостандығынан айыруды сұрағанымен, сот жеңілдетілген үкім шығарды. Шымкент қаласы Денсаулық сақтау басқармасының бұрынғы басшысы Темірхан Варзилов төрт жылға еркіндігін шектеу жазасына кесілді. Оның орынбасары Чингис Джанабаев 7 жылға бас бостандығынан айырылды. Кәсіпкер Ерлан Тышқанбаев бес жылға еркіндігін шектеу жазасын алды, сот залынан босатылды.
ҰҚК майоры Айдос Сраилов 304-бап (Қазақстан Республикасындағы заңсыз кәсіпкерлік) бойынша кінәлі деп танылып, бір жылға еркіндігін шектеу жазасына кесілді. Алайда оған қолданылған қазіргі амнистия бойынша жазаны өтеу қажет емес.
