Аятолла Әли Хаменеи қаза тапты, деп хабарлады Иранның мемлекеттік телеарналары.
Иранның жоғарғы рухани көсемі қаза тапты. Бұл туралы елдің мемлекеттік телеарналары мен БАҚ-тары мәлімдеді. Оқиға 28 ақпан күні таңертең АҚШ пен Израиль Иранға қарсы әуе операциясын бастаған сәтте болған.
«Ол шейіт болды», — деп жазады Иранның мемлекеттік IRNA агенттігі.
Иранда 40 күндік аза тұту жарияланды, аятолланы еске алу үшін алдағы бір апта жұмыс күні емес деп жарияланды.
Аятолла жайлы
Әли Хаменеи 1989 жылғы 4 маусымда Иранның Жоғарғы жетекшісі қызметіне тағайындалды.
Бұл шешім Иран Ислам Республикасының негізін қалаушысы – Рухолла Хомейни қайтыс болғаннан кейін қабылданды.
Хаменеи 1981–1989 жылдары Иран президенті қызметін атқарған. Ол бұл қызметке Иран–Ирак соғысы кезінде келген. 1980-жылдардағы соғыс жағдайы, халықаралық оқшаулау және ішкі саяси тұрақсыздық оның саяси тәжірибесін күшейтті.
Хаменеи кезеңінде Иран ядролық бағдарламасын дамытуға кірісті, аймақтық саясатта белсенді позиция ұстанды және Батыс елдерімен, әсіресе АҚШ-пен қатынасы күрделі сипат алды.
Оның билік моделі діни жетекшілік пен саяси бақылауды біріктіреді. Конституциялық тұрғыда президент елдің атқарушы билігін басқарғанымен, стратегиялық шешімдер Жоғарғы жетекші құзырында қалды.
