Болат Өтемұратов әйгілі халықаралық инвесторлар консорциумымен бірлесіп, Ариэль Эмануэль басқаратын жаңа жаһандық компания — MARI жобасына инвестиция құйды, деп хабарлайды Tizgin.kz.
Консорциум құрамына Apollo Global Management, RedBird Capital Partners, Qatar Investment Authority, Ares Management, A16Z, сондай-ақ Google компаниясының бұрынғы бас директоры Эрик Шмидт кіреді.
Жаңа компания спорт, өнер және мәдениетті тоғыстыратын активтер мен брендтердің портфелін қалыптастыруды, сонымен қатар жаһандық аудиторияны тартудың жаңа форматтарын дамытуды жоспарлап отыр.
MARI компаниясы Madrid Open және Miami Open атты беделді теннис турнирлерін (ATP Masters 1000 және WTA 1000 санатындағы) және Mubadala Citi DC Open жарысын сатып алу жөніндегі мәміленің аяқталғанын хабарлады. Бұдан бөлек, компания әлемдегі ең ықпалды өнер ұйымдарының бірі Frieze-ді және коллекциялық автокөліктерге арналған аукцион үйі Barrett-Jackson компаниясындағы ірі үлесті иеленді.
MARI компаниясының негізін қалаушы Ариэль Эмануэль мен директорлар кеңесінің мүшесі Марк Шапиро спорт, өнер және мәдениет индустриясындағы көпжылдық тәжірибесіне сүйене отырып, компанияның даму стратегиясын айқындайды. Ал Болат Өтемұратов теннис активтерін дамыту стратегиясын айқындайтын комитеттің құрамына кіреді.
