Молдовадағы қазіргі заман тарихындағы ең маңызды сайлаулардың бірі аталған саяси науқанда Еуропаға бағытталған билеуші партия жеңіске жетті, деп жазады DW.
28 қыркүйекте Молдовада елдің болашағын айқындайтын парламент сайлауы өтті. Алдағы төрт жылға сайланған депутаттар құрамы елді 2024 жылғы 25 маусымда басталған Еуропалық одаққа кіру жөніндегі ресми келіссөздер жолымен бастап кете ме, әлде бұл бағыттан бас тарта ма – осыны анықтайды. Алдын ала деректер бойынша, Еуропаға бағытталған билеуші «Әрекет және ынтымақ» (PAS) партиясы 49,6% дауыс жинап келеді.
Сенсация болған жайт – болжамдағыдай төрт емес, бес саяси күштің парламентке өтуі. Екінші орынға 24,5% нәтижемен социалистер партиясы (ПСРМ), коммунистер және «Молдованың болашағы» біріккен проресейшіл патриоттық блогы ие болды. Үштікті 8% дауыспен «Альтернатива» блогы түйіндеді. Бұл қозғалыс өзін проеуропалық деп атайды, бірақ қатарында ресейшіл саясаткерлер бар. Сонымен қатар 6,2% дауыспен Ренато Усатыйдың айқай-шулы «Біздің партиясы» парламентке өтті, ал күтпеген жерден шенеуніктерді сынаған TikTok роликтеріне негізделген науқан жүргізген Василий Костюктың «Үйдегі демократия» партиясы қажетті 5,6% дауыс жинады.
Жексенбі күні кешкі сегізде билеуші «Әрекет және ынтымақ» (PAS) партиясының сайлауалды штабында депутаттар мен еріктілер дауыс беру нәтижесін күтетін партиялық «сайлау түні» басталды. Алғашқы деректер дәстүр бойынша дауыс санау жеңілірек ауылдық жерлерден келді. Бастапқы мәліметтерде оппозициялық Патриоттық блок алға шыққаны байқалып, залды ұзаққа созылған үнсіздік басты, ал PAS жетекшісі Игорь Гросу тіпті БАҚ өкілдеріне екінші рет шығуын кейінге қалдырды.
Алайда қалалардағы дауыстар саналған сайын көрсеткіштер теңесіп, Еуропаға бағытталған PAS сенімді түрде бірінші орынға шықты. «Молдова Ресейді жеңді» деп сипаттады нәтижені кишиневтік саясаттанушы Виталий Андриевский.
Сарапшының айтуынша, мұндай пайыздық көрсеткішпен PAS 101 мандаттың шамамен 53-іне немесе одан да көп орынға үміттене алады. Бұл дегеніміз, Ресейдің қаржылай қолдауы мен ресейшіл күштердің барлық қарсы әрекетіне қарамастан, Еуропаға бағытталған билеуші партия үкіметті әрі қарай да өз бетінше құрып, қажетті заңдарды қабылдай алады. Оған коалиция қажет болмайды, ал үкіметтегі өзгерістер тек техникалық сипатта болады. Ал ең ірі оппозициялық Социалистер партиясы айқын жеңіліске ұшырады, деп есептейді Андриевский.
