Босқындарға көмек көрсететін агенттік Газа балалары “жоғалған ұрпаққа” айналу қаупінде тұрғанын ескертті, деп хабарлайды Tizgin.kz aa.com.tr-ға сілтеме жасап.
АГЕНТТІК МӘЛІМДЕМЕСІ
Газа секторындағы палестиналық босқындарға көмек көрсететін және жұмыс ұйымдастыратын БҰҰ-ның Таяу Шығыстағы агенттігі (БАПОР) Израильдің 23 айға жалғасқан соғысы салдарынан 660 мыңнан астам баланың үшінші жыл қатарынан мектепке бармай отырғанын мәлімдеді. Агенттіктің жазбаша мәлімдемесінде:
«Газадағы соғыс – бұл балаларға қарсы бағытталған соғыс. Мұндай жағдай дереу тоқтатылуы тиіс. Балалар әрқашан қорғалуы керек», – делінген.
БАПОР білім алу – әр баланың негізгі құқығы екенін атап өтіп, мынадай мәлімет келтіреді:
Соғыс салдарынан 660 мың бала қатарынан үш оқу жылын білімсіз өткізіп жатыр.
Агенттік Газа балалары “жоғалған ұрпаққа” айналу қаупінде тұрғанын ескертіп, атысты тоқтатуға және балаларға қалыпты өмірге, білімге қайта оралу мүмкіндігін беруге шақырды.
МИНИСТРЛІК НЕ ДЕЙДІ
Палестинаның Орта және жоғары білім министрлігі 28 тамызда мәлімдеме жасап, оккупацияланған Батыс жағалауда жаңа оқу жылы қыркүйек айының басында басталатынын хабарлады.
Министрлік дерегінше, Газадағы шамамен 700 мың оқушы екі жыл бойы білім алу мүмкіндігінен айырылған, ал 70 мыңнан астам мектеп оқушысы орта мектепке бармаған.
Палестина Білім министрлігінің 2023 жылғы 7 қазан мен 2025 жылғы 26 тамыз аралығындағы ресми статистикасына сәйкес, Израиль бастаған соғыс кезінде Газада бастауыш, орта және жоғары сынып оқушылары арасынан 17 мыңнан астам бала қаза тапқан. Сонымен қатар 1 261 университет студенті көз жұмып, 25 мыңнан астам мектеп оқушысы және 2 671 студент жарақат алған.
