Мал өсірушілер одағы төрағасы Даурен Салықов Қазақстаннан ет экспорттауға қойылатын талаптарды жұмсартуды ұсынды, деп хабарлайды Tizgin.kz kz.kursiv.media-ға сілтеме жасап.
САЛЫҚОВ НЕ АЙТТЫ
Оның айтуынша, қазіргі жағдайда экспорттық шектеулерді кезең-кезеңімен жедел әлсірету қажет. Бүгінде бар-жоғы бес ет комбинатына ғана экспортқа рұқсат берілген, ал көптеген бордақылау алаңы бұқаларға толып тұр, бірақ олар өнімін сыртқа шығара алмайды.
«Қазір талаптарды барынша қолжетімді ету керек екенін көріп отырмыз», – деді ол парламент мәжілісінде өткен етті мал шаруашылығын қолдау мәселелеріне арналған дөңгелек үстел барысында.
Салықов экспорттық шектеулерді кезең-кезеңімен алып тастап, квоталау тетігін салалық одақ арқылы берілетін лицензиялау жүйесіне ауыстыруды ұсынды.
Оның пікірінше, лицензиялау нарықтың барлық қатысушысы үшін ашық әрі түсінікті ережелерді қалыптастырып, сыбайлас жемқорлық тәуекелдерін азайтады. Онымен қоса, Қазақстан ішінде бордақылау алаңдары мен қайта өңдеу саласының дамуына серпін береді.
Бұған дейін үкімет ет экспортын шаруашылықтар мен бордақылау алаңдарының көлеміне қарай квоталау тетігін енгізген болатын. Салықовтың айтуынша, ет пен тірі мал экспорты саланың негізгі өсу драйверлерінің бірі ретінде қарастырылып, болжамды әрі басқарылатын болуы тиіс.
Сонымен қатар ол шағын және орта фермерлер үшін жеңілдетілген қаржыландырудың нақты қолжетімділігі қажет екенін атап өтті. Абай, Ұлытау және Қостанай облыстарындағы көшпелі мал шаруашылығын дамыту үшін жоғары өнімді мал сатып алуға жылдық 6 пайызбен 7–10 жылға несие беру ұсынылып отыр. Бұл шара арқылы 200 жаңа шаруашылық құру жоспарланған.
ЖАЙЫЛЫМ АУМАҒЫН ҚОРШАУ ҚАЖЕТ ПЕ
Ауыл шаруашылығы министрлігінің мәліметінше, қордағы жерлердегі жайылым көлемі 60 млн гектарды құрайды, оның ішінде көшпелі мал шаруашылығына жарамдысы – 13,1 млн гектар. Сондай-ақ министрлік айналым қаражатын толықтыруға жылдық мөлшерлемесі 5 пайыздан аспайтын жеңілдетілген қаржыландыруды ұсынады.
Осыған байланысты Салықов қарыз алушыларға қойылатын бастапқы талаптарды жеңілдетіп, әсіресе шағын және орта шаруашылықтар үшін кепіл саясатын қайта қарауды, сондай-ақ несие өтінімдерін қарау мерзімін барынша қысқартуды ұсынды.
Сондай-ақ мал өсірушілер одағының басшысы ветеринария мәселелерін, атап айтқанда ауру ошақтарымен уақтылы жұмыс істеу, алдын алу және жедел әрекет ету тетіктерін шешу аса маңызды екенін айтты. Оның сөзінше, жайылымдарды қоршау арқылы аурудың таралу қаупін 70 пайызға дейін төмендетуге болады. Алайда бұл үшін инвестициялық субсидиялау тәжірибесіне өзгерістер енгізіп, тиісті шығындарды нормативтерге қосу қажет.
Салықов қазір Қытайға ет экспортын негізінен Қазақстанның оңтүстік және шығыс өңірлеріндегі шаруашылықтар жүзеге асырып отырғанын атап өтті. Осыған байланысты ол экспорттау құқығы республикадағы барлық фермерге берілуі тиіс деп санайды.
