Қараша айындағы концерт жайлы хабарландырудан кейін әлеуметтік желі қолданушылары әншіге қатаң сын айтқан, деп хабарлайды Tizgin.kz порталы BES.media-ға сілтеме жасап.
Ресейлік әнші Полина Гагаринаның 27 қарашада Астанада өтуі жоспарланған концерті ресми түрде тоқтатылды. Бұл туралы қала мәдениет басқармасы ресми сауалға берген жауабында хабарлады. Әкімдік мәліметінше, E-otinish жүйесі арқылы шамамен 14 өтініш түсіп, концертті өткізуді тоқтату талап етілген. Концерт «күтпеген жағдайларға байланысты» болмайды.
«Жұлдыздар фабрикасы-2» байқауының жеңімпазы, 2015 жылғы «Евровидение» ән байқауында екінші орын иеленген ресейлік әнші әрі актриса Ресейдің Украинаға қарсы агрессиясын ашық қолдаған. Бұған дейін оның концерті Алматыда да тоқтатылған болатын.
