Әзербайжан ТМД-ға мүше елдердің ішкі істер министрлері кеңесінің отырысына қатысудан бас тартты, деп хабарлайды Tizgin.kz порталы АПА ақпарат агенттігіне сілтеме жасап.
«Әзербайжан ТМД-ға мүше елдердің ішкі істер министрлері кеңесінің 12 тамызда Санкт-Петербургте өткен отырысына қатысқан жоқ», — делінген хабарламада.
Шілде айында Баку Мәскеуде өткен ТМД Экономикалық кеңесінің отырысына да қатысудан бас тартқан еді. Ол кезде Әзербайжан президентінің көмекшісі — мемлекет басшысының әкімшілігі сыртқы саясат мәселелері бөлімінің меңгерушісі Хикмет Гаджиев бұл шешімнің Баку мен Мәскеу арасындағы қазіргі қарым-қатынасқа еш қатысы жоқ екенін түсіндірген.
ЕКІ ЕЛДІҢ АРАСЫ НЕГЕ СУЫДЫ
Баку мен Мәскеу арасындағы қарым-қатынас соңғы айларда айтарлықтай суып кетті. Бұған бірқатар оқиғалар тікелей әсер етті. 2024 жылы 25 желтоқсанда Баку-Грозный бағытындағы «Azerbaijan Airlines» ұшағы Ресей әуе кеңістігінде апатқа ұшырап, 38 адам қаза тапты. Кейін бұл әуе кемесінің Ресейдің әуе қорғаныс жүйесімен атып түсірілгені анықталды. Владимир Путин ресми түрде өкінішін білдіргенімен, Ресей жағы толық жауапкершілікті алған жоқ. Бұл трагедия екі ел арасындағы сенімге ауыр соққы болды.
Апаттан кейін екіжақты байланыстарды күрделендірген тағы бір жайт – 2025 жылдың ақпан айында Бакудегі «Russian House» мәдени орталығының жабылуы. Ресми себеп – тіркеу ережелерін бұзу, алайда бұл шешім Мәскеу тарапынан саяси белгі ретінде қабылданды. Маусымда жағдай одан сайын ушықты: Екатеринбургте этникалық әзербайжан азаматтары ұсталып, кейбірі қаза тапты. Бұл жайттар Бакуда үлкен наразылық туғызды. Жауап ретінде әзербайжан құқық қорғау органдары елдегі ресейлік журналистер мен кейбір азаматтарды қамауға алды, кейбірінде полиция тарапынан күш қолдану деректері тіркелді.
Саяси деңгейде де екі елдің арасы суығаны байқалды. Әзербайжан президенті Ильхам Әлиев Мәскеуде өткен Жеңіс күніне арналған шеруге қатысудан бас тартты. Бұл қадам ұлттық тәуелсіздікті көрсетуге бағытталған символдық шешім ретінде бағаланды. Сонымен қатар, Баку көпвекторлы сыртқы саясатты күшейтіп, Түркия, Қытай, Израиль және Украинамен әріптестікті кеңейтіп жатыр. Мұндай бағыт Ресейдің аймақтағы ықпалын шектеуге және стратегиялық бәсекені арттыруға алып келеді.
Қарабақтағы жағдай да қарым-қатынасқа әсер етті. 2023 жылғы қақтығыста Ресейдің бейтарап қалуы Әзербайжанды өз бетінше әрекет етуге итермеледі. Баку Жібек жолы арқылы экономикалық байланыстарды дамытып, Мәскеуге тәуелділікті азайтуға тырысуда. Барлық осы факторлар қосылып, бұрын стратегиялық серіктес саналған екі ел арасындағы қатынастың бүгінгі таңда айтарлықтай салқындауына себеп болды.
Ал жақында Әзербайжан президенті Ильхам Әлиев АҚШ-та президент Дональд Трамптың делдалдығымен Армения премьер-министрі Никол Пашинянмен бейбіт келісімге келетін маңызды құжатқа қол қойды.
