ҚМА онлайн-казиноны жарнамалайтын блогерлерді қылмыстық жауапкершілікке тартуды ұсынды

Қаржы мониторингі агенттігі (ҚМА) төрағасының орынбасары Қайрат Бижанов Қазақстанда онлайн-казиноны жарнамалағаны үшін қылмыстық жауапкершілік енгізу қажет екенін мәлімдеді. Бұл туралы ол Премьер-министр Олжас Бектеновтің қатысуымен өткен жиында айтты, деп хабарлайды Tizgin.kz.

Бижановтың айтуынша, интернеттегі құмар ойындарының белсенді түрде насихатталуы – бүгінде өзекті әрі қауіпті мәселелердің бірі.

«Кең аудиториясы бар кейбір блогерлер жеңіл табысқа құмарып, азаматтарды құмар ойындарына тартуда. Мұндай 37 тұлға анықталды, олардың 18-і әкімшілік жауапкершілікке тартылды», – деді ҚМА төрағасының орынбасары.

Оның сөзінше, бұл блогерлердің көбі заңды кездейсоқ емес, жүйелі түрде бұзады. Ал қазіргі қолданыстағы айыппұлдар олардың табысымен салыстырғанда тым төмен.

«Әкімшілік құқықбұзушылық туралы кодекстің 455-бабының 1-бөлігіне сәйкес, тыйым салынған қызметті жарнамалағаны үшін айыппұл мөлшері жеке тұлғаларға – 60, ал жеке кәсіпкерлерге – 300 айлық есептік көрсеткіш көлемінде белгіленген. Бұл сома олардың табысымен салыстырғанда мүлде сәйкес келмейді», – деп түсіндірді ол.

Бижановтың айтуынша, құмар ойындарын жарнамалауға тікелей жауапкершіліктің болмауы жағдайды одан әрі қиындатып отыр. Себебі дәл осы жарнама көп жағдайда ойынға тәуелділіктің алғашқы қадамына айналады.

«Біз онлайн-казино жарнамасы үшін қылмыстық жауапкершілік енгізуді ұсынамыз. Бұл шараны қаржы пирамидаларына қатысты қолданылатын тәжірибемен ұқсастыруға болады. Олжас Абаевич, осы бастаманы қолдауыңызды сұраймын», – деді ол премьер-министрге.