Жасанды интеллектті дамыту жөніндегі кеңестің алғашқы отырысында Мемлекет басшысы Қасым-Жомарт Тоқаев осы салада зерттеу жүргізетін арнайы университет құру жоспарланып отырғанын жариялады, деп хабарлайды Tizgin.kz Orda.kz-ке сілтеме жасап.
НЕ ҮШІН ҚАЖЕТ
Президент жыл соңына дейін ұсыныстар әзірлеуді тапсырды.
Бұл не үшін қажет? Басты мақсат – жасанды интеллект технологияларын экономиканың барлық саласына енгізе алатын білікті мамандарды даярлау. Зерттеу университеті ғылым мен білімнің орталығына айналуы тиіс, – деді Тоқаев.
ЖҰМЫСТЫ ҚАЛАЙ ЖЕҢІЛДЕТУГЕ БОЛАДЫ
Сондай-ақ ол мұғалімдерге күнделікті қарбалас жұмысты жеңілдету үшін нейрожеліні қолдануға кеңес берді.
– Нейрожелінің көмегімен жеке тапсырмалар мен дайындық тесттерін дайындауға, жауаптарды тексеруге болады. Оқушылармен кері байланысты жеделдетуге мүмкіндік мол. Бірақ мынаны естен шығармайық: ешқандай технология мұғалімнің жанашырлығын, бағыт-бағдар берудегі рөлін алмастыра алмайды. Шынай білім кепілі – ол әрине, ұстаз, – деді Президент.
Сол себепті мемлекет басшысы мемлекеттік стандарттарға сай келетін ұлттық білім беру платформасын әзірлеуді тапсырды.
