2025 жылы 1 қазаннан бастап АҚШ-та брендтік дәрі-дәрмекке 100 пайыздық тариф, жүк көліктеріне 25 пайыздық, ал жиһазға 50 пайызға дейін баж салығы енгізіледі. Бұл қадамдарды Ақ үй ұлттық қауіпсіздікті қорғау шарасы деп түсіндірді, деп хабарлайды DW.
АҚШ президенті Дональд Трамп дәрі-дәрмек, жүк көліктері және жиһаз импортына жаңа кедендік алымдар енгізілетінін мәлімдеді. Оның айтуынша, 1 қазаннан бастап барлық брендтік және патенттелген медикаменттерге 100 пайыздық тариф салынады, егер компаниялар өндірісін АҚШ аумағында жолға қоймаса. Бұл туралы Трамп 25 қыркүйек, бейсенбі күні өзінің Truth Social желісіндегі парақшасында жазды.
Бөлек мәлімдемесінде Трамп шетелде өндірілген барлық жүк көліктеріне 25 пайыздық баж салығы енгізілетінін хабарлады. Ол бұл шараны америкалық өндірушілерді қолдау үшін қажет деп атап, олардың қатарында Peterbilt, Kenworth, Freightliner және Mack Trucks компанияларын атады. АҚШ көшбасшысы шешімін, өзге себептермен қатар, «ұлттық қауіпсіздік мүдделерімен» байланыстырды.
Жиһазға әртүрлі мөлшерлеме белгіленген: асүй жиынтықтары, раковиналар және қосалқы тауарлар 50 пайыздық, ал жұмсақ жиһаз 30 пайыздық тарифпен салықтандырылмақ.
Соңғы айларда Трамп көптеген сауда әріптестеріне қатысты тарифтік саясатты күрт қатаңдатты. Одан да жоғары алымдардан қашып, сауда қатынастарына тұрақтылық енгізу үшін Еуроодақ 7 тамыздан бастап көптеген тауарға ортақ 15 пайыздық тарифке келісті.
Бейсенбі күні АҚШ Еуроодақтан келетін автокөліктерге салынған тарифті төмендетіп, оны 1 тамыздан бастап күшіне енетіндей етіп 15 пайыз деңгейінде бекітті (бұрынғысы – 27,5 пайыз). Дегенмен бұл көрсеткіш Трамп билікке келгенге дейінгі деңгейден әлі де жоғары. Болат пен алюминийге қатысты 50 пайыздық тариф бұрынғысынша сақталады.
