Кәрім Көкірекбаевтың бостандыққа шыққаны туралы ақпарат тарады

Жамбыл облысының бұрынғы әкімі Қарим Көкірекбаевтың түрмеден босатылғаны туралы ақпарат тарады. Журналист Михаил Козачковтың жазуынша, оның дереккөзі Көкрекбаев денсаулығына байланысты бостандыққа шыққанын айтқан, деп хабарлайды Tizgin.kz.
Журналистің сөзінше, тиісті шешімді өткен аптада Алматы облысындағы Алатау қаласының соты қабылдаған. Козачков бостандыққа шығу Қылмыстық кодекстің 75-бабында көзделгенін жазды. Құзырлы органдардан әзірге ресми түсініктеме түскен жоқ.
Көкрекбаев қандай іс бойынша сотталды?
Кәрім Көкірекбаев әр жылдары Жамбыл облысының әкімі, «Қазақстан темір жолы» АҚ-ның басшысы және «Қазселденқорғау» мемлекеттік мекемесінің жетекшісі болған.
Ол 2022 жылғы желтоқсанда 396 миллион теңге пара алды деген күдікпен ұсталған. Тергеу нұсқасына сәйкес, ақша «Bazis Construction INFR» ЖШС басшысы Андрей Поплавскийден Хоргос өзеніндегі қорғаныс нысандарында орындалмаған жұмысқа актілерге қол қою үшін берілген. Мемлекетке келтірілген шығын көлемі 2 миллиард теңгеге жуық деп бағаланған.
2025 жылы шілдеде сот Кәрім Көкірекбаевты 12 жылға бас бостандығынан айырды. Оның бұрынғы орынбасары Әділет Ахатаев пен компания өкілі Андрей Поплавский 11 жылға сотталған.