«Соңғы рет кешіріңдер»: ақын Ербол Бықыбаевтың жаңа видеосы тарады
Ақын ІІМ-нен кешірім сұрап, өзіне тағылған бапты өзгертуді өтінді.
Шерзат Полаттың қазасына қатысты жазған өлеңдерімен танылған ақын Ербол Бықыбаевтың жаңа бейнежазбасы әлеуметтік желіде тарады. Онда ақын өзіне қатысты жағдайға өлең жолдарымен үн қатып, Қазақстан Республикасының Ішкі істер министрлігінен кешірім сұрайды. Сондай-ақ өзіне тағылған қылмыстық бапты өзгерту жөніндегі өтінішіне әділ шешім шығаруды сұраған, деп хабарлайды Tizgin.kz.
«Ашумен айтқан сөзім өзімді құрбан етті»
Әлеуметтік желіде тараған бейнежазбада Ербол Бықыбаев соңғы уақытта басынан өткеріп жатқан жағдайға қатысты өлең оқиды. Ақын шығармасында бұрын айтқан сөздері үшін сынға қалғанын жеткізіп, өз әрекетіне өкініш білдіреді.
«Ағайын, жаза бастым жастығымнан,
Заманым түлкі болып рас құбылған.
Ашумен айтқан сөзім түптің-түбі,
Өзімді қылды бүгін басты құрбан!» – дейді ол.
Бейнежазбада ақын өзін қоғамдағы мәселелерге бейжай қарамаған адам ретінде сипаттайды. Сондай-ақ бұрын айтқан сөздерінің мас күйінде жеткізілгенін алға тартады.
«Мастықпен айтқан сөзді қиып салып,
Айыптап көр соқырлар содыр деді!» – деген жолдар арқылы ол өзіне бағытталған айыптауларға қатысты пікірін білдіреді.
Өлеңнің келесі шумақтарында Бықыбаев өзін содыр ретінде қабылдаумен келіспейтінін айтып, қоғамның өзіне деген көзқарасына алаңдаушылық білдіреді.
Бұл – ақынның бейнежазбада айтқан жеке ұстанымы. Оның сөздері қылмыстық іс бойынша анықталған мән-жайлар ретінде қарастырылмайды.
Ақын ІІМ-нен кешірім сұрады
Бейнежазбаның соңында Қазақстан Республикасының Ішкі істер министрлігіне арналған жазбаша өтініш көрсетіледі.
«Құрметті Қазақстан Республикасының Ішкі істер министрлігінен үлкен ниетпен, шынайы өкініп, кешірім сұраймын! Және маған тағылған бап талабын өзгерту жөніндегі өтінішім бойынша әділ шешім шығаруларыңызды сұраймын!» – деп жазылған жазбада.
Осылайша, ақын өзіне қатысты қолданылып жатқан қылмыстық-құқықтық саралауды қайта қарауды сұраған, алайда аталған өтініштің құқық қорғау органдарына ресми түрде жолданғаны және оның қаралып жатқаны туралы әзірге расталған ақпарат жоқ. Сондай-ақ бейнежазбаның нақты қашан және қандай жағдайда түсірілгені белгісіз.
Ербол Бықыбаев не үшін ұсталды
Еске салайық, 2026 жылғы 5 қарашада әлеуметтік желілерде ақын Ербол Бықыбаевтың Тараз қаласында ұсталғаны туралы ақпарат тараған болатын. Заңгер Дәулетхан Ахметовтің мәліметінше, ақынға Қазақстан Республикасы Қылмыстық кодексінің 256-бабының 2-бөлігі бойынша күдік келтірілген.
Аталған бап ақпарат құралдарын немесе ақпараттық-коммуникациялық желілерді пайдалана отырып терроризмді насихаттауға қатысты. Заңгердің түсіндіруінше, бұл бап бойынша кінәсі дәлелденген адамға 7 жылдан 12 жылға дейін бас бостандығынан айыру жазасы көзделген.
Бұған дейін Бықыбаевтың әлеуметтік желідегі тікелей эфирлерінің бірінде айтқан сөздері тергеуге себеп болуы мүмкін екені хабарланған. Алайда нақты қай мәлімдемесі қылмыстық іске негіз болғаны ресми түрде нақтыланбаған. Ербол Бықыбаев көпшілікке Талғарда қаза тапқан 16 жастағы Шерзат Полаттың ісіне байланысты жазған өлеңдерімен танылған. Оның «Қарабет» атты туындысы әлеуметтік желілерде кеңінен тараған еді. Қазіргі уақытта ақынға қатысты қылмыстық істің мән-жайы мен оның процессуалдық мәртебесіне байланысты толық ресми ақпарат жарияланған жоқ.
