ФРГ канцлері 27-28 тамызға қараған түні Киевке жасалған әуе соққыларынан кейін мәлімдеме жасады, деп хабарлайды Tizgin.kz порталы.
«Украина президенті мен Ресей президентінің кездесуі, өткен аптадағы Трамп пен Путин арасындағыдай, болмайды», – деді Фридрих Мерц Безансонда Эмманюэль Макронмен кездесудің алдында.
Сонымен қатар, АҚШ Ақ үйі де Путин мен Зеленский қақтығысты өз бетімен аяқтауға дайын емес екенін мәлімдеді.
Пресс-хатшы Кэролайн Левиттің сөзінше, Трамп Киевке жасалған соққыларға қатысты «қуаныш та, таңданыс та білдірмеген» және жағдайды мұқият бақылап отыр.
«Бұл мәселеге қатысты Трамп кейін қосымша мәлімдеме жасайды», – деді Левит.
Ол сондай-ақ, егер Ресей мен Украина қаламаса, АҚШ президентінің бейбітшілікке қол жеткізуге бағытталған әрекеттері жеткіліксіз болатынын атап өтті.
Осы уақытта The Atlantic басылымы Трамп өз дипломатиясының нәтижесіз қалғанына қапалы екенін және Украина талаптарын «шынайы емес» деп санайтынын жазды. Оның ойынша, соғыстың аяқталуы керек және оған «қалай аяқталатыны аса маңызды емес».
Еске салайық, 28 тамызға қараған түні Ресей әскері жасаған соққы салдарынан 22 адам қаза тапты, олардың арасында төртеуі – бала (Киев қалалық әскери әкімшілігінің соңғы мәліметі бойынша).
Путинмен Анкориджде, кейін Вашингтонда Зеленскиймен кездескеннен кейін, Трамп екі көшбасшы арасындағы келіссөздерге «дайындықтың басталғанын» бірнеше рет мәлімдеген еді. Алайда кейін ол Зеленский мен Путиннің кездесуін ұйымдастыруға көмектесуден бас тартты.
