АҚШ президенті Дональд Трамп Ресейге қарсы «тозақ санкциялары» аталып кеткен шектеулерді неге кейінге қалдырғанын түсіндірді. Оның айтуынша, бұл шешім Мәскеуді Украина жөніндегі келіссөздерге қатыстыруды жалғастырып, Ресейдің Иранға көмегін шектеуге бағытталған, деп хабарлайды Tizgin.kz DW басылымына сілтеме жасап.
«Ресейді келіссөз үстелінен алыстатқым келмейді»
Трамп бұл ұстанымын 18 қазанда Truth Social әлеуметтік желісіндегі жазбасы арқылы білдірді. АҚШ президенті санкцияларды дәл қазір күшейту Ресеймен жүргізіліп жатқан келіссөздерге кедергі келтіруі мүмкін деп есептейді.
«Ресейге қатысты шешімімнің себебі өте қарапайым. Қазір Ресей мен Украина арасында бейбіт келіссөздерді жүргізіп жатырмын. Ресейді келіссөз үстелінен алыстатуы мүмкін екенін ескере келе ақымақтың қадамын жасағым келмейді», – деп жазды ол.
Трамптың айтуынша, Мәскеумен келіссөздерде, соның ішінде тұтқындарды босату мәселесінде «айтарлықтай ілгерілеу» бар. Ол санкцияларды кейін де енгізе алатынын мәлімдеді.
«Бұл құжатқа дәл қазір қол қою осындай жағымсыз нәтижеге әкеледі. Оған кейін, қажет деп тапқан кез келген уақытта қол қоя аламын!» – деді АҚШ президенті.
Ол шешімінің тағы бір себебін Иранмен байланыстырды. Трамптың мәлімдеуінше, Ресей Иранға өзінің ықтимал мүмкіндігімен салыстырғанда өте аз көмек көрсетіп отыр. Ақ үй басшысы осы жағдайдың сақталғанын қалайтынын жеткізді.
Зеленскийге сын және кейінге қалған санкциялар
Трамп сол жазбасында Украина президенті Владимир Зеленскийді тағы да сынады. Оған Украина әскерінің Ресейдегі дизель отынын өндіретін мұнай өңдеу зауыттарына соққы беруі себеп болған. АҚШ президентінің пікірінше, мұндай шабуылдар әлемдік дизель нарығына, соның ішінде Америкадағы тұтынушыларға зиян келтіреді. Ол бұдан фермерлер, ранчо иелері мен түрлі саладағы кәсіпкерлер зардап шегіп отырғанын алға тартты.
Трамп Ресейдің әлемдік нарыққа арзан бағамен миллиондаған баррель дизель жеткізуін жалғастырып жатқанын айтып, Зеленскийді бұған мән бермейді деп айыптады. Сондай-ақ Украина басшысы соғысты аяқтауға ұмтылмайды деген пікірін қайталады. Оның пайымынша, Украина екі жыл бұрын қазіргіден тиімдірек келісімге келе алатын еді. Бұл – Трамптың саяси бағасы.
DW мәліметінше, Линдси Грэм ұсынған санкциялық тетік Ресей тауарларына 500 пайыздық қосымша баж енгізуді көздейді. Сондай-ақ Ресей мұнайы мен газын ең көп сатып алатын бес елдің және Мәскеуге санкцияларды айналып өтуге барынша көмектесетін мемлекеттердің өнімдеріне 100 пайыздық баж қарастырылған.
Заң бойынша Трамп шектеулерді 18 қазанға дейін енгізуге тиіс болған. Алайда АҚШ-тың ұлттық мүддесіне сай келсе, олардың қолданысқа енгізілуін уақытша тоқтата тұруға мүмкіндік берілген. Басылымның жазуынша, Трамп 17 қазанда осы өкілеттігін пайдаланған.
