Түркістан облысының Қазығұрт ауданында жеке үйді жөндеу кезінде шатыр астынан 5 миллион теңгеден астам ақша табылды. Үй иесі бұл қаражатты жылдар бойы жинағанын айтқан. Полиция қажетті тексеру аяқталғаннан кейін ақшаның заңды иесіне қайтарылатынын хабарлады, деп жазады Tizgin.kz.
Ақшаны үй жөндеуге көмектескен тұрғындар тапқан
Полицияның мәліметінше, жергілікті тұрғындар егде жастағы әйелге үйін жөндеуге көмектескен. Жұмыс барысында олар шатыр астынан ақша тауып, Қазығұрт аудандық полициясына хабарлаған.
Үйдің шатырын қарап шыққан полицейлер бірнеше пакетке салынған қаражатты анықтады. Оның жалпы сомасы 5 миллион теңгеден асады.
«Алдын ала мәлімет бойынша, жанашыр тұрғындар егде жастағы әйелге үйін жөндеуге көмектескен. Жұмыс барысында олар шатыр астынан ақша тапқан. Үй иесінің айтуынша, бұл қаражатты ол көп жыл бойы жинаған», – деп хабарлады полиция.
Қаражат заңды иесіне қайтарылады
Полиция қажетті шаралар жүргізіліп, барлық мән-жай анықталғаннан кейін ақшаның заңды иесіне қайтарылатынын мәлімдеді.
Ведомство өкілдері өзгенің мүлкін немесе ақшасын тауып алған жағдайда құқық қорғау органдарына дереу хабарлау қажет екенін еске салды. Бұл табылған мүліктің кімге тиесілі екенін анықтап, азаматтардың заңды құқықтары мен мүдделерін қорғауға мүмкіндік береді.
