Мал өсіретін шаруаларға мемлекеттен қандай қолдау бар
Мал шаруашылығын қолдауға 150 млрд теңге бөлінген
Қазақстанда мал шаруашылығын қолдау үшін «Игілік», «Береке» және «Жайлау» бағдарламалары арқылы жеңілдетілген несие беріліп жатыр. Бұл бағытқа 150 млрд теңге қарастырылып, соның 63,5 млрд теңгесі бөлінген. Ал сүт фермаларын салу мен кеңейтуге арналған бөлек бағдарлама бойынша несие жылдық 2,5 пайызбен беріледі. Бұл туралы ауыл шаруашылығы вице-министрі Азат Сұлтанов баяндады, деп хабарлайды Tizgin.kz.
Мал өсіретін шаруаларға қандай көмек беріліп жатыр
Мал шаруашылығын дамыту жөніндегі кешенді жоспардың негізгі мақсаты – өндірісті көбейтіп, малдың өнімділігін арттыру. Шаруаларға көрсетіліп жатқан қолдаудың бірі – жеңілдетілген несие. «Игілік», «Береке» және «Жайлау» кредиттік өнімдері бойынша қаржыландыруға барлығы 150 млрд теңге көзделген. Вице-министрдің мәліметінше, қазір оның 63,5 млрд теңгесі бөлінген.
Ет өндірумен айналысатын бордақылау алаңдарына да жеңілдетілген несие беріліп жатыр. Бұл қаржы айналым қаражатын толықтыруға, яғни шаруашылықтың күнделікті жұмысын жүргізуге қажет шығындарды қаржыландыруға арналған. Биыл осы бағытта 73 өтінім бойынша 52,2 млрд теңге берілген. Малдың тұқымын жақсарту жұмысы да жүріп жатыр. Жыл басынан бері елге 9 мыңнан астам асыл тұқымды ірі қара әкелінген. Тағы шамамен 16 мың ірі қара мен 7 мың қой-ешкі іріктеу және карантин кезеңінен өтуде.
Алайда баяндамада «Игілік», «Береке» және «Жайлау» бағдарламаларының әрқайсысы бойынша несие мөлшерлемесі, қарыздың ең жоғары сомасы, кепіл талаптары мен өтінім беру тәртібі көрсетілмеген.
Сүт фермасын салуға және кеңейтуге 2,5 пайыздық несие беріледі
Сүт өндіретін шаруашылықтарға Солтүстік Қазақстан облысының тәжірибесін басқа өңірлерге тарату бағдарламасы арқылы қолдау көрсетіліп жатыр. Бұл бағдарламада несие мөлшерлемесі – жылдық 2,5 пайыз. Осы қаржы есебінен сүт фермаларын салу және кеңейтуге арналған 99 жоба қаржыландырылған. Олардың жалпы жобалық қуаты шамамен 600 мың тонна сүт өндіруге мүмкіндік береді.
Қазір соның 71 фермасы пайдалануға берілген. Бұл фермалардың жалпы өндірістік қуаты 460 мың тоннадан асады. Бұл көрсеткіш нақты өндірілген сүт көлемін емес, фермалардың толық жұмыс істегенде өндіре алатын көлемін білдіреді. Жыл соңына дейін іске қосылған фермалардың жұмыс көлемін жобалық қуатының 70 пайызына жеткізу жоспарланған. Яғни шаруашылықтар өндірістік мүмкіндігінің кемінде оннан жеті бөлігін пайдалануы керек.
Вице-министрдің мәліметінше, азық-түлік өнімдерін өндіру көлемі жалпы алғанда 13,8 пайызға өсіп, 3,2 трлн теңгеге жеткен. Өндірісті одан әрі арттыру үшін жаңа сүт фермаларын іске қосып, бордақылау алаңдарын дамыту көзделіп отыр.
