Астананың Сарайшық ауданындағы 12 қабатты тұрғын үй кешенінде өрт шықты. Құтқарушылар үш адамды, оның ішінде бір баланы қауіпсіз жерге шығарды. Зардап шеккендер жоқ, деп хабарлайды Tizgin.kz Төтенше жағдайлар министрлігіне сілтеме жасап.
Кабель шахтасында өрт шыққан
Оқиға 11 қазанда А-52 көшесінде орналасқан тұрғын үй кешенінде болды. Оқиға орнына жеткен өрт сөндірушілер бірінші қабаттан тоғызыншы қабатқа дейінгі кабель шахтасында электр кабелі жанып жатқанын анықтаған.
Құтқарушылар дереу өртті сөндіруге және тұрғындарды құтқаруға кірісті. Авариялық-құтқару жұмыстары барысында баспалдақ арқылы үш адам, оның ішінде бір бала құтқарылды.
Өрт толық сөндірілді
ТЖМ мәліметінше, өрт 27 қума метр аумақта толық сөндірілді. Өрт сөндірушілер оттың одан әрі таралуына жол бермеді. Зардап шеккендер тіркелген жоқ.
Министрлік өрт белгілері байқалған жағдайда дереу 112 нөміріне хабарласуды ескертеді. Өрт кезінде лифтіні пайдаланбай, құтқарушылардың нұсқауларын орындау қажет.
