10 қазанда Сауд Арабиясы астанасы Эр-Риядтағы Король Халид халықаралық әуежайына жасалған шабуылдан кемі 12 адам қаза тапты. Соңғы мәлімет бойынша, 309 адам жараланған, деп хабарлайды Tizgin.kz Reuters агенттігіне сілтеме жасап.
Қаза тапқандар арасында шетел азаматтары бар
Сауд Арабиясының азаматтық авиация басқармасы қаза тапқандардың төртеуі ел азаматы екенін хабарлады. Қалғандары – Бангладештің екі азаматы және АҚШ, Иордания, Палестина, Сирия, Судан мен Мысырдың бір-бір азаматы. Associated Press агенттігінің мәліметінше, жараланғандар бірнеше ауруханаға жеткізілген. Олардың арасында жағдайы аса ауыр адамдар бар.
Агенттікке аты-жөнін жарияламау шартымен сөйлеген өңірлік лауазымды тұлға зымыранның ішкі рейстерге қызмет көрсететін үшінші және төртінші терминалдар орналасқан кешенге түскенін айтқан.
Әуежай жұмысы тоқтатылды
Шабуылдан кейін әуежайдың жұмысы уақытша тоқтатылып, рейстер басқа әуежайларға бағытталған. Associated Press Flightradar24 дерегіне сүйеніп, шектеу 11 қазан күні жергілікті уақытпен сағат 21:00-ге дейін ұзартылғанын хабарлады.
Сауд Арабиясы бастаған әскери коалиция шабуылға Йемендегі хуситтерді кінәлап, жауап беретінін мәлімдеді. Алайда Reuters материалы жарияланған сәтте хуситтер бұл шабуыл үшін жауапкершілікті өз мойнына алмаған.
АҚШ мемлекеттік хатшысы Марко Рубио мен БҰҰ бас хатшысы Антониу Гутерриш шабуылды айыптады. Гутерриш бейбіт тұрғындар мен азаматтық инфрақұрылымға соққы беру халықаралық құқықты бұзатынын атап өтті.
