«Қазатомөнеркәсіп» акционерлерінің кезектен тыс жалпы жиналысында ресейлік «Ураниум Уан Груп» компаниясына табиғи уран жеткізу жөніндегі ірі мәміле мақұлданбады. Дауыс беруге қатысқан акциялардың 88,34%-ы қалыс қалғандықтан, шешім қабылдауға қажетті көпшілік жиналмаған, деп хабарлайды Tizgin.kz компанияның ресми ақпаратына сілтеме жасап.
Сырттай дауыс берудің қорытындысы 2026 жылғы 7 қазанда шығарылып, нәтижесі 8 қазанда жарияланды. Жиналысқа компанияның дауыс беретін акцияларының 99,21%-ына иелік ететін акционерлер мен олардың өкілдері қатысты.
Уран жеткізу келісімі неге мақұлданбады
Акционерлердің қарауына «Ураниум Уан Груп» компаниясына U3O8 түріндегі табиғи уран жеткізу туралы келісім ұсынылған. «Қазатомөнеркәсіп» оны компанияның мүдделілігі бар ірі мәміле ретінде көрсеткен. Дауыс беру қорытындысы бойынша мәмілені қолдаған акциялардың үлесі 5,39%, қарсы болғандардың үлесі 6,27% болды. Ал 88,34%-ы қалыс қалған.
Компанияның түсіндіруінше, бұл мәселе бойынша шешім қабылдау үшін дауыстардың қарапайым көпшілігі қажет еді. Осы талап орындалмағандықтан, келісім жасасу туралы шешім қабылданбады. Дауыс беру нәтижесі мәміленің мақұлданбағанын көрсетеді. Алайда бұл келісімнен түпкілікті бас тартылды дегенді білдірмейді. Хабарламада акционерлердің қалыс қалу себебі, мәселенің қайта қаралу ықтималдығы, сондай-ақ жеткізілетін уран көлемі мен келісім сомасы көрсетілмеген.
«Ураниум Уан Груп» – Мәскеуде орналасқан ресейлік компания. Оның ресми сайтында бас кеңсесінің Ресей астанасында екені көрсетілген.
Екінші уран мәмілесі мақұлданып, директорлар кеңесі жаңарды
Осы жиналыста акционерлер State Nuclear Uranium Resource Development Company Limited компаниясымен табиғи уран концентраттарын сатып алу-сату жөніндегі споттық келісімді мақұлдады.
Бұл мәмілені дауыс беруге қатысқан акциялардың 88,63%-ы қолдаған. Қарсы дауыс бергендердің үлесі 6,49%, қалыс қалғандардың үлесі 4,88% болды. «Қазатомпромның» мәліметінше, аталған келісім өзара байланысты басқа мәмілелермен жиынтықта ірі мәміле саналады әрі компанияның оны жасасуға мүдделілігі бар.
Акционерлер директорлар кеңесінің құрамына да өзгеріс енгізді. Елжас Отыншиевтің кеңес мүшесі ретіндегі өкілеттігі мерзімінен бұрын тоқтатылды. Оның орнына «Самұрық-Қазына» мүддесінің өкілі ретінде Жандос Қайргелді сайланды. Ол директорлар кеңесінің қазіргі құрамының өкілеттік мерзімі аяқталғанға дейін қызмет атқарады.
