Ұлытауда марганецті заңсыз өндіріп, шетелге шығарғандар анықталды. Сатылған шикізаттың жалпы құны 950 млн теңгеден асады. Бұл туралы Қаржылық мониторинг агенттігі мәлімдеді, деп хабарлайды Tizgin.kz.
ҚМА-ның Ұлытау облысы бойынша департаменті Қаражал қаласындағы «Восточный» карьерінде жүргізілген заңсыз кен өндіру жұмысын тоқтатқан.
Агенттік мәліметінше, күдіктілер заңсыз кен өндіру үшін ауыр карьер техникасын – экскаваторлар, тиегіштер мен самосвалдарды пайдаланған.
«Карьер аумағында өндірістік база жабдықталып, онда өндірілген шикізат ұсақтау-жуу кешені арқылы өңделген. Нәтижесінде сатылған марганец кенінің көлемі 4 мың текше метрден асып, оның құны 950 млн теңгеден асады», – делінген ҚМА хабарламасында.
Тергеу дерегіне сәйкес, өңделген марганец кені кейін жүк көліктеріне тиеліп, тиісті құжаттарды пайдалану арқылы Қазақстан аумағынан тыс жерге шығарылған.
Қазір аталған дерек бойынша тергеу жалғасып жатыр.
