Атырау қаласының әкімі болып Данияр Таханов тағайындалды. Ол бұған дейін «Атырау» әлеуметтік-кәсіпкерлік корпорациясын басқарған. Бұл туралы Tizgin.kz Атырау облысы әкімдігінің баспасөз қызметіне сілтеме жасап хабарлайды.
Жаңа әкімге қандай міндеттер жүктелді
Данияр Тахановты тағайындау туралы өкімге облыс әкімі Болат Ақшолақов қол қойған. Оның кандидатурасы Президент Әкімшілігімен және қалалық мәслихат депутаттарымен келісілген.
Өңір басшысы жаңа әкімге тұрғындардың өзекті мәселелерін шешу үшін жүйелі жұмыс жүргізуді тапсырды. Басым міндеттер қатарында халықты жұмыспен қамту, инженерлік инфрақұрылымды дамыту, кәріз бен электрмен жабдықтау жүйелерін жаңарту бар.
Сондай-ақ жылыту маусымын өткізу, апатты үйлердегі тұрғындарды көшіру, қоғамдық қауіпсіздік пен қаланы абаттандыруға назар аудару жүктелді. Ақшолақов қала мәселелерін депутаттармен және тұрғындармен тығыз байланыста шешу қажеттігін атап өтті.
Данияр Таханов туралы не белгілі
Данияр Таханов 1985 жылы Атырауда дүниеге келген. Бейжіңдегі Қытай мұнай университетін «Өндірістік-коммерциялық басқару» және «Өндірістік экономика» мамандықтары бойынша бітірген. «Болашақ» халықаралық стипендиялық бағдарламасының түлегі.
Еңбек жолын 2009 жылы «ҚазҚұрылысСервис» АҚ-да бастаған. 2012 жылы Sinopec Engineering компаниясының Қазақстандағы филиалында инженер болып жұмыс істеген.
2012–2017 жылдары «Орал» әлеуметтік-кәсіпкерлік корпорациясы басқарма төрағасының орынбасары және «Atyrau Innovations» ЖШС директоры қызметтерін атқарған.
2017 жылдан бастап «Атырау» ӘКК-де басшылық қызметтерде жұмыс істеді. 2022 жылғы мамырдан бері корпорацияны басқарған.
