Зайсан көлінде суға кеткен екі балықшының денесі табылды. Екінші балықшы – 1968 жылы туған ер адамның денесін Тарбағатай ауданында жергілікті тұрғындар тапқан. Іздеу жұмыстары бірнеше күнге созылды, деп хабарлайды Tizgin.kz.
Іздеу тәулік бойы жүргізілген
Төтенше жағдайлар министрлігі мен құтқару қызметтері іздеу жұмыстарын күрделі жағдайда тәулік бойы жүргізген. Оқиға орнында Шығыс Қазақстан облыстық төтенше жағдайлар департаментінің жедел штабы үздіксіз жұмыс істеген.
Сүңгуірлер үлкен тереңдікке сегіз рет түскен. Су астында айналаның мүлде дерлік көрінбеуі және көл түбінің күрт ойлы-қырлы болуы іздеуді қиындатқан.
Операцияға катерлер, арнайы техника, суасты жабдықтары мен ТЖМ дрондары жұмылдырылған. Құтқарушыларға жергілікті тұрғындар да көмектескен.
Құтқарушылар сақтыққа шақырды
Құтқарушылар қаза болғандардың отбасылары мен жақындарына көңіл айтты.
Сондай-ақ тұрғындарды суда барынша сақ болуға, дауылды ескертулерді назардан тыс қалдырмауға және құтқару кеудешесін міндетті түрде киюге шақырды.
