Шығыс Қазақстан облысының Зайсан ауданында әйелді өлтірді деген күдікпен кәмелетке толмаған жасөспірім ұсталды. Кейін сот оны қамауға алуға санкция берген, деп хабарлайды Tizgin.kz.
Күдікті қамауға алынды
Әйелдің өліміне байланысты сотқа дейінгі тергеу басталған. Күдікке ілінген оқушы ұсталып, сот шешімімен қамауға алынған. Қазір қажетті тергеу және процессуалдық әрекеттер жүргізіліп жатыр.
Полиция қандай қауесетті жоққа шығарды
Оқиғадан кейін әлеуметтік желіде марқұмның мұғалім болғаны және жасөспірімнің қауіпті интернет-ойынның ықпалымен қылмысқа барғаны туралы қауесет тараған. ШҚО полициясы бұл мәліметтерді жоққа шығарды. Ведомствоның хабарлауынша, қайтыс болған әйел педагог болып жұмыс істемеген. Сондай-ақ тексеру барысында жасөспірімнің қауіпті интернет-ойындарға қатысы анықталмаған.
Полиция азаматтар мен БАҚ өкілдерін тек ресми ақпаратқа сүйеніп, тексерілмеген мәліметтерді таратпауға шақырды.
