«Ахуал Сегодня» YouTube-арнасының авторы Азамат Омаров 3,5 жылға шартты түрде сотталып, сот залынан босатылды. Оған бес жыл бойы жарияланым жасауға да тыйым салынды. Бұл туралы құқық қорғаушы Бақытжан Төреғожинаның Facebook-тегі хабарламасына сілтеме жасап Tizgin.kz хабарлайды.
Процестік келісім бойынша босатылды
Құқық қорғаушының мәліметінше, Омаров процестік келісім бойынша сот залынан босатылған. Оған тағайындалған шартты жазаның мерзімі – үш жыл алты ай. Бұған қоса, бес жылға жарияланым жасауға тыйым салынған. Алайда берілген ақпаратта бұл шектеудің нақты қандай платформалар мен жарияланым түрлеріне қатысты екені нақтыланбаған.
Адвокат сот қаулысы туралы не айтты
Азамат Омаров 18 шілдеде екі айға қамауға алынған еді. Оған қылмыстық кодекстің әлеуметтік, ұлттық, рулық, нәсілдік, тектік-топтық немесе діни алауыздықты қоздыру туралы 174-бабы бойынша күдік келтірілген. Бұл мәліметті сол кезде оның адвокаты да растаған.
