Президент Қасым-Жомарт Тоқаев Lotte Group төрағасы Дон Бин Шинді қабылдады. Кездесуде компанияның Қазақстандағы тамақ өнеркәсібі, логистика және қонақүй бизнесіне инвестиция салу жоспары талқыланды. Келіссөздер қорытындысы бойынша Hotel Lotte Co. Ltd және Sensata Invest өкілдері Алматы мен Alatau City-де Lotte қонақүйлерін салу жөніндегі өзара түсіністік туралы меморандумдармен алмасты, деп хабарлайды Ақорда.
«Рахатты» дамыту және логистикаға инвестиция салу
Президент Lotte компаниясын екі ел арасындағы экономикалық ынтымақтастыққа елеулі үлес қосқан Қазақстанның байырғы серіктестерінің бірі деп атады. Тоқаев кореялық компанияның тамақ өнеркәсібіндегі қызметін жоғары бағалады. Атап айтқанда, «Рахат» брендін дамыту және Алматы мен Шымкенттегі өндіріс орындарын жаңғырту жұмыстарын атап өтті.
Мемлекет басшысы Lotte Global Logistics компаниясының көлік-логистика инфрақұрылымын кеңейту жоспарына арнайы тоқталды. Бұл алдағы уақытта компанияның өңірлік және халықаралық нарықтарға шығу мүмкіндігін кеңейтеді деп күтіледі. Өз кезегінде Дон Бин Шин Қазақстанның тамақ өнеркәсібіне, логистикалық қызмет көрсету саласына және қонақүй бизнесіне инвестиция салу ниетін растады.
Lotte қонақүйлері және Alatau City жобаларына қатысу
Келіссөздерде қонақүй бизнесін дамыту мәселесі де талқыланды. Тоқаев Алматыда Lotte брендімен алғашқы қонақүй салу туралы келісімге қол қойылуын құптап, компанияның елдегі қызмет аясын одан әрі кеңейтуге мүмкіндігі мол екенін атап өтті.
Lotte Group төрағасы Alatau City-ді дамыту жобаларына, соның ішінде Iconic Complex кешенін салуға қатысу ниеті туралы да айтты.
Кездесу қорытындысы бойынша Hotel Lotte Co. Ltd және Sensata Invest компаниялары Алматы мен Alatau City-де Lotte қонақүйлерін салу жөніндегі өзара түсіністік туралы меморандумдармен алмасты. Хабарламада инвестиция көлемі, құрылыс мерзімі және қонақүй жобаларының параметрлері нақтыланбаған.
