Қазақстанда жалпы ішкі өнімінің елеулі бөлігін қалыптастырып отырған 22 ұлттық компания мен холдинг жұмыс істейді. Өткен жылғы қаржылық есептілік негізінде олардың топ-менеджерлеріне төленген сыйақы көлемі сараланды, деп хабарлайды Tizgin.kz.
Көш бастаған компаниялар
Finprom.kz мәліметінше, басшылығына ең көп сыйақы төлеген компаниялар қатарында «Қазатомпром» бірінші орында тұр. Компания былтыр топ-менеджментіне жалпы 903,3 млн теңге бағыттапты.
Бұдан бөлек үздік үштікке:
- «Қазақстан темір жолы» (ҚТЖ) – 721,3 млн теңге;
- «ҚазМұнайГаз» – 519,1 млн теңге кірді.
Алғашқы ондықта QazaqGaz (515,2 млн теңге), «Қазақтелеком» (504,1 млн теңге), KEGOC (496,3 млн теңге), «Бәйтерек» ұлттық басқарушы холдингі (440,4 млн теңге), Қазақстанның экспорттық-кредиттік агенттігі (283,3 млн теңге), «Ұлттық ақпараттық технологиялар» (188,4 млн теңге) және «Тау-Кен Самұрық» (170,9 млн теңге) бар.
Қай компанияда төлем өсті
Ұлттық компаниялардағы топ-менеджерлер саны әртүрлі. Кей жерде бір адам, кейбірінде оннан астам адам жұмыс істеп жатыр. Былтыр олардың көбінде басшылыққа төленетін жалпы сыйақы көлемі артқан.
Ең жоғары өсім «Қазатомпромда» тіркелді. Компания топ-менеджментіне төленген сыйақы 226,7 млн теңгеге, яғни 33,5%-ға өскен.
QazaqGaz-та төлем көлемі 94,5 млн теңгеге (+22,5%), ал «Ұлттық ақпараттық технологияларда» 86,9 млн теңгеге (+85,7%) артқан.
Басшылыққа кететін шығын
Ал төрт компанияда басшылыққа төленетін шығын қысқарған. Олар – «Қазақтелеком» (-130,5 млн теңге), «Қазақстан Ғарыш Сапары» (-69,2 млн теңге), «Қазпошта» (-26,7 млн теңге) және Kazakh Tourism (-6,2 млн теңге).
Компаниялардағы топ-менеджерлер саны әртүрлі болғандықтан, бір басқарушыға шаққандағы орташа төлемді қарастырған жөн. Нақты сома атқаратын лауазымына қарай өзгеруі мүмкін.
Былтырғы табыс
- «Қазатомөнеркәсіп» – бір адамға жылына 112,9 млн теңге;
- KEGOC – 99,3 млн теңге;
- «Бәйтерек» ҰБХ – 62,9 млн теңге;
- «ҚазМұнайГаз» – 57,7 млн теңге;
- Қазақстанның экспорттық-кредиттік агенттігі – 56,7 млн теңге табыс тапты.
