Әуежайда немесе ұшақ бортында байқаусызда айтылған жалғыз сөз қазақстандықтарға 21 миллион теңге айыппұл арқалатуы немесе бес жылға бас бостандығынан айыруы мүмкін. Бұл туралы Азаматтық авиация комитеті (КГА) ескертті, деп хабарлайды Tizgin.kz.
Тыйым салынған сөздер
Комитеттің хабарлауынша, «бомба», «жарылыс», «террорист», «қару», «басып алу» сияқты сөздер қауіптің белгісі ретінде бағаланады. Әуедегі қауіпсіздік хаттамасына сәйкес, бұзақылық немесе әзіл сипатында айтылған хабарламалардың барлығы шынайы қауіп ретінде қарастырылып, шұғыл шаралар қабылдауды талап етеді.
«Бұл шаралар артық реакция болып көрінгенімен, авиация саласы үшін қалыпты стандарт саналады. Экипаж мүшелері мен қауіпсіздік қызметі ақпараттың әзіл-қалжың немесе шынайы қауіп екенін айыра алмайды», – делінген ведомство хабарламасында.
Қауіпсіздікке қатер төнгені туралы белгі түскен жағдайда мынадай бекітілген процедуралар іске қосылады:
-
Ұшақ пен жүктерді толық қайта тексеру;
-
Арнайы шұғыл қызметтерді шақыру;
-
Жолаушыларды эвакуациялау немесе әуежайға кіруді уақытша шектеу;
-
Әуе кемесін ауыстыру және рейсті кейінге қалдыру.
Осының салдарынан әуежайлар мен әуе компаниялары үлкен қаржылық шығындарға ұшырайды.
«Әзіл» үшін жаза
Авиациялық қауіпсіздік ережелерін бұзғаны және көрінеу жалған ақпарат таратқаны үшін заңнамада қатаң жаза қарастырылған. Қазақстан Республикасы Қылмыстық кодексінің 273-бабына («Терроризм актісі дайындалып жатқаны туралы көрінеу жалған хабарлау») сәйкес кінәлі тұлғаларға төмендегідей жаза түрлері қолданылады:
-
5 000 АЕК-ке дейінгі мөлшерде айыппұл салу (21,6 млн теңгеден астам);
-
Тиісті мерзімге түзеу жұмыстары;
-
5 жылға дейінгі мерзімге бас бостандығын шектеу немесе дәл сондай мерзімге бас бостандығынан айыру.
Азаматтық авиация комитеті әуе көлігі қызметін пайдаланушыларды әуежайда және бортта сөйлеу мәдениеті мен қауіпсіздік талаптарын қатаң сақтауға шақырады.
