10 қыркүйек күні таңертең әлемдік мұнай бағасы төмендеген жоқ. Brent маркалы мұнайдың баррелі 100 доллардан жоғары саудаланып жатса, америкалық WTI мұнайы да қымбаттай түсті, деп хабарлайды Tizgin.kz.
Баға өсімінің себебі
Бұған танкерлерге жасалған жаңа шабуылдар мен Ормуз бұғазы арқылы мұнай жеткізіліміне төнген қауіп әсер еткен. Reuters мәліметінше, Brent мұнайына арналған фьючерстер 0,1%-ға өсіп, барреліне 101,34 долларды құрады.
Ал америкалық West Texas Intermediate (WTI) мұнайының бағасы 0,5%-ға көтеріліп, барреліне 96,55 долларға жетті.
Бір күн бұрын Brent сауда сессиясын барреліне 101,21 доллар деңгейінде аяқтап, 3,4%-ға қымбаттаған. WTI бағасы да 3,25%-ға өсіп, 96,05 долларды құрады. Екі марка үшін де бұл – 22 мамырдан бергі ең жоғары жабылу деңгейі.
Бес танкер жойылған
Мұнай бағасының өсуіне Таяу Шығыстағы ахуалдың одан әрі шиеленісуі себеп болып отыр. Иран Ормуз бұғазы маңында он кемеге шабуыл жасалғанын мәлімдеді. Бұған дейін АҚШ билігі Иранға тиесілі бес мұнай танкері жойылғанын хабарлаған болатын.
Сарапшылар не дейді
Сарапшылар бағалауынша, тараптардың өзара соққысы Парсы шығанағынан мұнай жеткізілімі мерзіміне теріс әсер етіп отыр. Қақтығысқа дейін әлемдік мұнай мен газ жеткізілімінің шамамен бестен бір бөлігі өткен Ормуз бұғазы арқылы тасымал көлемі әлі де төмен.
Сонымен қатар АҚШ Энергетикалық ақпарат басқармасы (EIA) әлемдік мұнай қорларының қысқаруы мен Таяу Шығыстан жеткізілімдердің төмендеуін ескеріп, биылғы және келесі жылға арналған мұнай бағасы болжамын көтерді.
