Көкшетауда салынып жатқан нысанда құрылыс жұмыстары кезінде 2007 жылы туған азамат тоғызыншы қабаттан құлап, оқиға орнында көз жұмды, деп хабарлайды Tizgin.kz.
Полиция қылмыстық іс қозғады
Ақмола облысы полиция департаментінің баспасөз қызметінің мәліметінше, оқиға 8 қыркүйекте Көкшетау қаласында болған.
Ведомствоның хабарлауынша, құрылыс жұмыстары кезінде 2007 жылы туған азамат 9-қабаттан құлаған.
«Алған ауыр жарақаттарының салдарынан ол оқиға орнында көз жұмған. Аталған дерек бойынша полиция қылмыстық іс тіркеп, сотқа дейінгі тергеп-тексеру жұмыстарын бастады», – деп жазылған хабарламада.
Еңбек инспекциясына әзірге хабарлама түспеген
Сонымен қатар, Қазақстан Республикасы Еңбек және халықты әлеуметтік қорғау министрлігі Мемлекеттік еңбек инспекциясы комитетінің Ақмола облысы бойынша департаментіне бұл оқиға туралы әзірге ресми хабарлама түспеген.
Инспекция өкілдерінің айтуынша, оқиғаға қатысты хабарлама келіп, тиісті бұйрық шыққаннан кейін ғана арнайы тергеу басталады.